Astana-Almaty baǵytyndaǵy poıyzdar jańardy: Stadler vagondarynyń ereksheligi nede

Jolaýshylarǵa qandaı jaǵdaı jasalǵan

Jańa vagondar №3/4 «Nurly jol – Almaty-2» poıyzynyń quramyna engizildi. Alǵashqy saparyna 11 qarashada shyqqan poıyz endi kún saıyn qatynaıtyn bolady. Astanadan saǵat 13:10-da attanyp, kelesi kúni tańǵy 08:30-da Almatyǵa jetedi. Osylaısha, eki qala arasyndaǵy jolǵa 19 saǵat 20 mınýt ketedi.

Jańa poıyzdyń quramynda kýpe jáne platskart vagondary bar. Kýpe vagony 40 jolaýshyǵa, al platskart 58 adamǵa eseptelgen. 

Jańa Stadler vagondarynda jolaýshylardyń jaıly sapar shegýine erekshe kóńil bólingen. 

Kýpeler keń, jatyn oryndar yńǵaıly. Ár jolaýshyǵa jeke jaryq shamy, telefon men basqa da qurylǵylardy qýattaýǵa arnalǵan rozetkalar, USB jáne USB-C uıashyqtary qarastyrylǵan.

Sondaı-aq poıyzda Wi-Fi jelisi, beınebaqylaý júıesi men júk qoıatyn oryndar da bar.

Jolaýshylar úshin taǵy bir qolaıly múmkindik – ár kýpedegi aýa temperatýrasyn jeke retteý. Máselen, bir vagonda otyrǵan adamdar óz kýpesinde qalaǵan temperatýrasyn ornata alady.

– Ár kýpede temperatýrany jeke retteý múmkindigi bar. Jolaýshylar vagonnyń jalpy salonyndaǵy temperatýraǵa qaramastan, ózderine qolaıly jaǵdaı jasaı alady. Sonymen qatar alǵashqy sapardyń ózinde smartfondaryn spýtnıktik ınternetke qosýǵa múmkindik bar, - dedi «Jolaýshylar tasymaly» AQ «Suńqar» fılıalynyń dırektory Medet Mahatov.

Múmkindigi shekteýli jolaýshylar úshin arnaıy jabdyqtalǵan kýpe men keń dárethana da qarastyrylǵan. Dárethanada súıenish tutqalar, qaýipsizdik beldigi bar jınalmaly oryndyq jáne qoljýǵysh ornatylǵan. Al kýpede jolaýshy ornynan turmaı-aq jolserikti shaqyra alatyn arnaıy shaqyrý batyrmalary bar. Bul jolaýshynyń ózine qajetti kómekti ózgege táýeldi bolmaı suraýyna múmkindik beredi.

Budan bólek, kýpe men platskarttaǵy sanıtarlyq bólmelerde de jolaýshylardyń qajettiligi eskerilgen. Atap aıtqanda, dárethanalarda ushaqtardaǵydaı sábıdiń jaıalyǵyn aýystyrýǵa arnalǵan jınalmaly ústel ornatylǵan. Bul ásirese kishkentaı balasymen saparǵa shyqqan ata-analar úshin qolaıly.

Sondaı-aq býfet aımaǵy qarastyrylyp, jol ústinde tamaqtaný múmkindigi de jasalǵan.

Osylaısha, uzaq saparǵa shyqqan jolaýshylar poıyzdaǵy tamaqtaný qyzmetin de paıdalana alady. Biraq ol bılettiń baǵasyna kirmeıdi.

Budan basqa, Medet Mahatov otandyq Stadler vagondary Qazaqstannyń aýa raıyna beıimdelip jasalǵanyn da atap ótti. 

– Olar –50 gradýstan +45 gradýsqa deıingi temperatýrada paıdalanýǵa jaramdy. Qyzmet etý merzimi 40 jyldy quraıdy. Ár vagonda jolserikterdiń demalýyna arnalǵan jeke kýpe de bar, - dedi fılıal dırektory.

Sonymen qosa ol vagondardaǵy basqarý júıeleriniń avtomattandyrylǵanyn da eske saldy.

Medet Mahatovtyń aıtýynsha, zamanaýı tehnologııalar jolserikterdiń jumysyn edáýir jeńildetedi.

Vagondar saǵatyna 160 shaqyrym jyldamdyqpen júre ala ma

Stadler vagondarynyń jobalyq jyldamdyǵy saǵatyna 160 shaqyrymǵa jetedi. Degenmen olardyń naqty qozǵalys jyldamdyǵy temirjol ınfraqurylymynyń jaǵdaıy baılanysty.

– Jańa vagondardyń konstrýktsııalyq jyldamdyǵy saǵatyna 160 shaqyrymdy quraıdy. Bul jyldamdyqqa jetý ábden múmkin. Biraq poıyzdyń naqty qanshalyqty jyldam júretini temirjol ınfraqurylymy men lokomotıvtik tartymǵa baılanysty. Qazir osy másele boıynsha jumys júrgizilip jatyr, - dep túsindirdi Medet Mahatov.

2030 jylǵa deıin 557 vagon jetkizilmek

Jańa poıyzdy iske qosý rásiminde Kólik vıtse-mınıstri Jánibek Taıjanov jolaýshylar vagondary parkin jańartý memlekettik kólik saıasatynyń basym baǵyttarynyń biri ekenin atap ótti.

– Shveıtsarııalyq Stadler kompanııasymen birlesip atqaryp jatqan jumys elimiz úshin mańyzdy. Búgin jańa vagondar alǵash ret jolaýshylar kóp qatynaıtyn Astana – Almaty baǵytyna shyqty. Jolaýshylar olardyń jaılylyǵy men múmkindikterin joǵary baǵalaıdy dep senemin. Bul – jumystyń basy ǵana. Aldaǵy maqsatymyz – elimizdegi jolaýshylar poıyzdaryn birtindep jańartyp, qaýipsiz ári jaıly vagondardy barlyq baǵytta qalypty jaǵdaıǵa aınaldyrý, – dedi vıtse-mınıstr.

«Jolaýshylar tasymaly» AQ basqarma tóraǵasynyń orynbasary Ánýar Ahmetjanov jobanyń birneshe jyl boıy júzege asyrylǵanyn atap ótti. Onyń sózinshe, 2021 jyldyń qarashasynda Prezıdent Qasym-Jomart Toqaevtyń Shveıtsarııaǵa resmı sapary kezinde «Qazaqstan temir joly» men Stadler arasynda strategııalyq yntymaqtastyq týraly kelisim jasalǵan. 2022 jyly uzaq merzimdi kelisimsharttarǵa qol qoıylyp, 2025 jyly Astanada jolaýshylar vagondaryn serııalyq óndirý bastaldy.

– Búgin biz Qazaqstanda shyǵarylǵan Stadler vagondarynan jasaqtalǵan alǵashqy poıyzdyń iske qosylýyna kýá bolyp otyrmyz. Bul oqıǵanyń artynda birneshe jyldyq júıeli jumys jatyr. Jolaýshylar úshin eń aldymen qaýipsizdik pen qolaıly jaǵdaı mańyzdy. Degenmen zamanaýı tehnıkalyq jabdyqtalýmen qatar, qyzmet kórsetý sapasynyń da joǵary bolýy qajet, - dedi Ánýar Ahmetjanov.

Qazirgi ýaqytta «Jolaýshylar tasymaly» AQ 100-den astam Stadler vagonyn qabyldaǵan. Kelisimshart boıynsha 2030 jyldyń sońyna deıin barlyǵy 557 vagon kezeń-kezeńimen jetkiziledi. Olarǵa keıingi 20 jyl boıy tehnıkalyq qyzmet kórsetý de qarastyrylǵan.

Aıta keteıik, 13 qarashada Stadler vagondarynan jasaqtalǵan kelesi poıyz «Nurly jol – Semeı» baǵyty boıynsha alǵashqy saparǵa shyǵady.

Jańa poıyzdarǵa bıletterdi temirjol kassalarynan jáne resmı bılet satý júıesi arqyly satyp alýǵa bolady.

Buǵan deıin Qazaqstanda jańa Stadler vagondaryn qazan aıynyń sońy men qarasha aıynyń basynda paıdalanýǵa berý josparlanǵany habarlanǵan edi.