Astana alǵash ret ınvestıtsııa tartý kórsetkishi boıynsha kósh bastady

ASTANA. KAZINFORM – Astana alǵash ret óńirler arasynda ınvestıtsııa tartý kórsetkishi boıynsha kósh bastady. Bul týraly qalalyq ınvestıtsııalar jáne kásipkerlikti damytý basqarmasy basshysynyń orynbasary Nurjan Áshimov óńirlik kommýnıkatsııalar qyzmeti uıymdastyrǵan onlaın brıfıngide aıtty.

- Bıylǵy 9 aıdyń qorytyndysy boıynsha qala ekonomıkasyna tartylǵan ınvestıtsııa kólemi 1,7 trln teńge boldy. Naqty ósim – 36 paıyz. Astana bul kórsetkish boıynsha tarıhta alǵash ret óńirler arasynda birinshi orynǵa shyǵyp otyr. Atalǵan 1,7 trln teńgeniń 1,1 trln teńgesi – jeke menshiktiń ınvestıtsııasy. Onyń ósimi – 21,7 paıyz, - dedi ol.

Negizgi ósim dınamıkasy jyljymaıtyn múlikpen baılanysty operatsııalarda, kólik jáne qoıma qyzmetinde, bilim berý, ónerkásip jáne qarjy salasynda baıqalǵan. Sheneýniktiń sózinshe, bıyl qala boıynsha 120 mlrd teńgeniń 29 iri jobasyn iske asyrý kózdelgen.

- Jyl basynan beri sonyń 13-i iske asyrylyp bitti. Qalǵan 16 joba jyl aıaǵyna deıin qoldanysqa beriledi, - dedi Nurjan Áshimov

Úkimettiń resmı málimeti boıynsha, jyl basynan beri Qazaqstanǵa tartylǵan tikeleı sheteldik ınvestıtsııa kólemi 10,1 mlrd dollarǵa jetken.