Astana álemniń 600 qalasymen básekege túsedi - Qaırat Kelimbetov
ASTANA. QazAqparat - «Astana» halyqaralyq qarjy ortalyǵynyń basqarýshysy Qaırat Kelimbetov Qazaqstannyń astanasy jýyq arada álemniń aldyńǵy qatarly eń iri 600 qalasymen básekege túsetinin málim etti, dep habarlaıdy «QazAqparat» HAA tilshisi.
«Aldaǵy 30 jylda ekonomıkasy damyǵan memleketterdiń ǵana emes, qalalardyń arasynda báseke báıgesi qyza túsedi. Búgingi tańda álemniń 600 qalasy degenimiz - jer jahannyń ishki jalpy óniminiń 80 protsenti ekenin eskerý kerek. Sol sebepti, halyqaralyq básekede Qazaqstannyń qaı qalasy ozyq ekenin kórsete bilýdiń mańyzy zor. Astana - básekelestik úshin №1 qala bola alady. Básekege qabiletti bolý úshin Astana «aqyldy qalalardyń» jahandyq jelisiniń bir bólshegine aınaldy», - deıdi Qaırat Kelimbetov Úkimet úıinde ótken baspasóz máslıhatynda.
Onyń aıtýynsha, halyqaralyq qarjy ortalyǵy Astanany yqpaldy qalalardyń qataryna qosýda kúsh salatyn bolady. Qaırat Kelimbetov óz sózinde EKSPO aýmaǵynda «aqyldy qalanyń» saraptama ortalyqtaryn qurý úshin ákimdikpen memorandýmǵa qol qoıylǵanyn jetkizdi.
«Qarjy ortalyǵy qurylýy úshin Astana «aqyldy qalalardyń» birine aınalýy kerek dep aıtýǵa bolady. Bul turǵyda qalanyń ınfraqurylymyna ǵana emes, Astananyń halyqaralyq jetekshi qarjy ortalyqtarymen baılanysyna da basa mańyz beriledi. Aldaǵy eki jylda Nıý-Iork, Tokıo, Sıngapýr, Shańhaı sııaqty irgeli shaharlarǵa tike ushatyn reıster ashylady dep úmittemin», - deıdi ol.
Sonymen qatar, Qaırat Kelimbetov qarjy ortalyǵynyń tek qana Astananyń damýy úshin jumys atqaratyny týraly áńgimeni joqqa shyǵardy.
«HQO - Qazaqstannyń barlyq óńirlerine ınvestıtsııa tartý baǵytynda jumys atqaratynyn atap ótkim keledi. Sonymen birge, eń mańyzdy jaıttardyń biri - Astananyń ınfraqurylymnyń qurylysyn qoldaý salasynda ınvestıtsııa tartýdyń habyna aınalady. Biz Qorǵastan bastalyp, Astanadan ótetin, ary qaraı ár túrli baǵytta Reseıge jol tartatyn Jibek jolyn - osynaý barlyq ınfraqurylymdyq ınvestıtsııalardy HQO arqyly qoldaımyz dep esepteımiz», - dedi ol.
