Astana álemdik jáne dástúrli din kóshbasshylarynyń suhbat alańyna aınaldy - sarapshy pikiri
ASTANA. QazAqparat - Astana álemdik jáne dástúrli din kóshbasshylarynyń suhbat alańyna aınaldy. Bul pikirdi QR MSM Din isteri komıteti Mádenıet jáne din halyqaralyq ortalyǵynyń aǵa sarapshysy A.Aǵymbaeva bildirdi.
«Qazaqstan Respýblıkasy táýelsizdik jyldary ishinde konfessııaaralyq jáne etnosaralyq kelisimniń ózindik biregeı modelin qurdy. Qazaqstanda ár túrli konfessııaǵa qulshylyq etetin túrli etnostardyń sany da basym. Osyǵan oraı Qazaqstan jáne onyń elordasy Astana álemdik jáne dástúrli dinder kóshbasshylarynyń suhbat alańyna aınalyp otyr», - dedi ol.
Onyń atap ótýinshe, álemdik jáne dástúrli dinder kóshbasshylarynyń sezin qazaq jerinde ótkizý búkil álem halqynyń dástúrine, qundylyqtaryna, mádenı jetistikterine degen qurmetti bildiredi.
«Qazaqstan zaıyrly ári dinnen jeke turǵan memleket bolyp sanalǵanymen konfessııalar arasyndaǵy suhbattastyqty damytýǵa óz septigin tıgizip keledi. Bizdiń memleketimiz barlyq halyqtar men túrli din ókilderiniń janjalsyz beıbit ómir súrýine jaǵdaı jasaýda baǵa jetpes tájirıbege ıe», - dedi sarapshy.
A.Aǵymbaevanyń sózine qaraǵanda, din kóshbasshylarynyń birlesip jumys isteýi qoǵamdaǵy turaqtylyqty, halyqtardyń ózara túsinistigin qamtamasyz etedi. Sonymen birge dinı sebeptermen oryn alatyn janjaldardyń shyǵý sebebin anyqtaýǵa da múmkindik beredi.
