Astana álemdik týrıstik ortalyqqa aınalady
ASTANA. QazAqparat - EKSPO kórmesin qabyldaǵanǵa deıin Astana ózin álemdik týrıstik naryqtaǵy ornyqty ortalyq retinde tanytyp, astanalyqtar úshin de, sheteldikter úshin de óte jaıly, tartymdy qalaǵa aınaldy. Al, Qazaqstan búkilálemdik kórmeni ótkizýge qol jetkizgen Azııanyń tórtinshi memleketi retinde jahandyq kórmeler tarıhynan oıyp oryn aldy.
Aǵymdaǵy jyldyń 9-shi maýsymynda saltanatty túrde ashylǵan halyqaralyq kórmege álemniń 115 memleketi, 22 halyqaralyq uıym qatysýda. Aldyn-ala jasalǵan boljam boıynsha, 10 maýsym men 10 qyrkúıek aralyǵynda ótetin aýqymdy sharaǵa 2-3 mıllıonǵa jýyq qonaqtar keledi dep kútilýde.
Árıne, shetelden keletin qonaqtardy eń aldymen turatyn jeri, ishetin asy, demalys jaǵdaılary qyzyqtyratyny belgili. Qazirgi kezde elordamyzda 197 qonaq úı men 91 hostel týrısterge esigin aıqara ashty. Sonymen birge, kórme qonaqtaryn ornalastyrýǵa múmkindigi bar 18 jataqhana daıyn tur. Jataqhanada turýǵa nıet bildirgender táýligine bar-joǵy 2-den 5 myńǵa deıin aqy tóleıdi. Buǵan qosa, elordanyń ártúrli aýdandarynan 10 myń asa jaıly, quny qymbat páterler de daıyndaldy.
Elorda qonaqtaryna kómek retinde úsh jerde - halyqaralyq áýejaıdyń jańa termınalynda, «Nurly jol» jańa temirjol vokzalynda jáne «Mega Dilk Way» saýda-sattyq jáne oıyn-saýyq ortalyǵynda týrısterge aqparat beretin dúńgirshekter qoıyldy. Ol jerden kez-kelgen týrıst elorda týraly - kólik, qonaq úı, as ishetin jer, demalys oryndary týraly tolyq aqparat ala alady. Jańa dúńgirshekter ashylǵannan keıin, olardyń barlyǵy jataqhana boıynsha oryn brondaýdyń ortaq júıesine qosylady. Sondaı-aq, EKSPO-ǵa oraı alty shetel tilin biletin 150 GID daıyndaldy. Taksıdegi jolaýshyny birneshe tildi meńgergen baılanys ortalyǵynyń operatorymen qosatyn «Friendly taxi» qyzmeti iske qosyldy.
Quzyrly mekemelerdiń málimetine súıener bolsaq, Astana 2 mıllıon týrısti tamaqtandyrýǵa daıyn kórinedi. Bul úshin bas qaladaǵy barlyq meıramhanalar men dámhanalarda, ashanalarda kem degende 110 myń oryn bolýy kerek. Búgingi kúni Astanada uzyn-sany 800-ge jýyq tamaqtanatyn oryndar tirkelgen. Sonyń ishinde 273-i - 80 myń qonaqty qabyldaı alatyn meıramhana, 460-y - 23 myń adamǵa qyzmet kórsete alatyn dámhana bar. Buǵan qosa, 3 myń oryndyq taǵy 27 ashana ashylǵan. «Kórme kezinde 160 myń tonna azyq-túlik tutynylady» dep boljaýda quzyrly mekemeler.
Astanada demalys oryndary jeterlikteı. Elordamyzdyń sımvoly - «Báıterek» monýmenti kúrdeli jóndeýden keıin esigin ashty. Ǵımaratta restavratsııalyq jumystar qolǵa alynyp, eskertkishtiń ishki bezendirilýi ózgertildi. Jańashyldyq biri - bólek LED-ekrany bar qazirgi zamanǵy óner galereıasy ashyldy, sondaı-aq monýmenttiń foıesine gabarıtti ıilgen LED-ekran ornatyldy. Monýmenttiń tóbesindegi aspanda samǵap júrgen Samuryq qustar túrindegi aspaly sham da kelýshilerdi tánti etpek. Jóndeý jumystary kezinde múmkindigi shekteýli jandardyń da ǵımaratqa kirýine jaǵdaı jasaý máselesi qarastyryldy. Budan bólek, týrısterge qolaıly jaǵdaı jasaý úshin kirý bıletteri satylatyn termınaldar qoıyldy. Bıletterdiń baǵasy - 15 jasqa deıingi balalar úshin 300 teńge, eresekterge - 700 teńge. Jumys ýaqyty: 10:00-den 22:00-ge deıin.
10 shildede «Dýman» oıyn-saýyq ortalyǵynyń janyndaǵy jańa «Sholý dońǵalyǵy» iske qosylady. Bıiktigi 65 metrdi quraıtyn bul dońǵalaq elimizdegi eń bıik attraktsıon bolmaq. Onyń 36 kabınasy jazda aýa baptaǵyshpen, qysta jylytqyshpen jabdyqtalǵan. Demek, sheteldik týrıster elordanyń demalys oryndarynan da esten ketpesteı áser alatyny sózsiz.
