Astana álemdik qoǵamdastyqqa bitimgershilik protsesterdiń orny retinde tanymal - Elbasy
«Sizderdi qonaqjaı qazaq jerinde qarsy alǵanymyzǵa shynaıy qýanyshtymyz. Dinı kóshbasshylarǵa, halyqaralyq uıymdardyń ókilderine, saıasatkerler men sarapshylarǵa bizdiń sezdi shaqyrý týraly bastamamyzǵa qoldaý kórsetip, onyń jumysyna qatysqandary úshin tereń qurmetimizdi bildirýge ruqsat etińizder. Osy jerde alǵashqy tarıhı sezd ótkizilgen kezden beri 15 jyl ótti. Búgin biz 6-shy ret jınalyp otyrmyz. Buǵan deıingi otyrystarǵa qatysqan eski dostarymyzdy kórý men úshin qýanyshty jaıt. Astanaǵa alǵash ret kelip otyrǵandar da qosh keldińizder»,- dedi sezd jumysyn ashqan Nursultan Nazarbaev.
Sonymen qatar Memleket basshysy aǵymdaǵy jyly elordamyz Astana qalasy óziniń 20 jyldyq mereıtoıyn atap ótkenin eske saldy.
«Álemdik jáne dástúrli dinder kóshbasshylary sezin onyń vızıtkalyq kartasy dep ataýǵa bolady. Sebebi biz bul qalany elordamyz Astanany barlyq mádenıetterge ashyq Eýrazııanyń bolashaq qalasy retinde saldyq», - dedi Elbasy.
QR Prezıdenti búginde Astana búkil álemdik qoǵamdastyqqa bitimgershilik protsessterdiń, bastamalardy túıindestirýdiń núktesi retinde tanymal bolǵanyn atap ótti.
«Elordamyz úshin tilektestik, ózara qurmet pen toleranttylyqtyń aıryqsha rýhy tán», - dedi Elbasy.
Eske sala keteıik, elordada QR Prezıdenti Nursultan Nazarbaevtyń tóraǵalyǵymen Álemdik jáne dástúrli dinder kóshbasshylarynyń VI sezi ótip jatyr.
