Astana álemdegi úzdik týrıstik baǵyttar tizimine endi
ASTANA. KAZINFORM — Halyqaralyq Lonely Planet týrıstik basylymy Astanany Best in Travel 2027 jyl saıynǵy úzdik baǵyttar men týrıstik áserler toptamasyna engizdi, dep habarlaıdy elorda ákimdiginiń resmı saıty.
Qazaqstan astanasy 2027 jyly saıahattaýǵa usynylǵan álemniń túkpir-túkpirindegi 50 oryn men týrıstik áser qaldyratyn tizimge endi
Best in Travel 2027 toptamasyna Lonely Planet komandasy tańdaǵan 25 týrıstik baǵyt pen 25 týrıstik áser qaldyratyn tizim engizilgen. Astana tizimge derbes týrıstik baǵyt retinde enip, «Best for futuristic skylines» — fýtýrıstik sáýletimen erekshelenetin qala retinde usynyldy.
Lonely Planet avtorlary elordanyń zamanaýı sáýleti men kózge birden túsetin qalalyq kelbetine nazar aýdarǵan. Qalanyń qazirgi beınesin qalyptastyratyn erekshe sáýlettik sheshimder men nysandardyń úılesimine aıryqsha mán berilgen.
Lonely Planet-tiń Astanaǵa arnalǵan jeke gıdinde de qalanyń sáýleti elordanyń basty erekshelikteriniń biri retinde atalady. Basylym qalanyń kórnekti nysandary qatarynda «Báıterek» monýmentin, «Han Shatyr» saýda jáne oıyn-saýyq ortalyǵyn, Beıbitshilik jáne kelisim saraıyn, «Qazaqstan» Ortalyq kontsert zalyn jáne zamanaýı sáýlettiń basqa da nysandaryn atap ótken.
Astananyń Best in Travel 2027 tizimine enýi Qazaqstan astanasyna derbes týrıstik baǵyt retinde halyqaralyq qyzyǵýshylyqtyń joǵary ekenin kórsetip, qalany álemdik týrıstik naryqta tanytýǵa qosymsha múmkindik beredi.
Buǵan deıin Qazaqstan da Lonely Planet basylymynyń joǵary baǵasyna ıe bolǵan. Best in Travel 2025 toptamasynda el saıahattaýǵa usynylǵan baǵyttardyń qatarynda boldy. Al 2027 jylǵy tizimde Astana men onyń zamanaýı sáýlettik kelbetine erekshe nazar aýdarylǵan.
Búginde Astanada zamanaýı sáýlet úlgileri, úlken qoǵamdyq keńistikter jáne qazaqstandyq ári sheteldik sáýletshiler jobalaǵan túrli nysandar qatar ornalasqan.
Birneshe onjyldyq ishinde qala zamanaýı sáýlet sheshimderin ulttyq naqyshpen úılestirip, ózindik kelbetin qalyptastyrdy.
Astananyń Best in Travel 2027 tizimine enýi elordaǵa sheteldik týrısterdiń qyzyǵýshylyǵyn arttyrýy múmkin. Bul qala týraly halyqaralyq deńgeıde kóbirek aqparat taratyp, onyń týrıstik múmkindikterin tanytýǵa jol ashady.
Buǵan deıin Astanada batpaqty jerdiń ornyna 4 mlrd teńgege ekosaıabaq salynǵanyn jazdyq.
