Astana álem megapolısterimen 2050 jyldan bastap básekege túsetin bolady

Astana ákimdiginiń baspasóz qyzmetiniń málimetterine qaraǵanda, EKSPO kórmesine daıyndyq sheńberinde Qazaqstan elordasynda «Astana - jańa jahandyq aqyldy qala» (Global Smart City) bastamasy iske asyryla bastaıdy.

«Astana 2020 jyly jahandyq qalanyń negizderin qurý máselelerin tolyqtaı sheship, bizdiń makroaımaqtaǵy Baký, Tbılısı, Úrimshi, Qazan, Novosibir, Ekaterınbýrg sııaqty qalalardyń arasynda ınvestıtsııa, ómir súrý jaılylyǵy jáne týrısterdiń kelýi boıynsha kóshbasshylyq ornyn nyǵaıtýǵa tıis. 2030 jyly Eýrazııalyq makroaımaqtyń kóshbasshy qalalary Máskeý, Ystanbul, Ankara jáne Ábý-Dabı qalalarymen, al 2050 jyly álemniń jahandyq megapolısterimen básekelesýge tıis», - dep habarlady búgin elorda ákimdigindegi keńeste Astana ákimi Áset Isekeshev.

Atalǵan úsh kezeńdi eskere otyryp, 2017 jyldyń qańtarynan bastap eki basymdyq boıynsha qalanyń ekonomıkalyq strategııasy iske asyryla bastaıdy. Birinshisi ómir súrý sapasyn arttyrý jáne halyqtyń kirisin kóbeıtý esebinen turǵyndardyń ál-aýqat deńgeıin kóterý, ekinshisi astanany jahandyq aqyldy qalaǵa transformatsııalaý.

100 qadam ult josparyna sáıkes, Astana iskerlik, oqıǵalyq jáne medıtsınalyq týrızmniń ortalyǵyna aınalýǵa tıis.

«Sol sebepti biz týrızm men qarjy ortalyǵyn basty basymdyqtar retinde qarastyryp otyrmyz. Týrızm boıynsha biz orta merzimdik kezeńde jylyna 1 mln sheteldik týrıst tartýǵa qol jetkizýimiz kerek. Bul úshin birinshiden, qalany týrıstıfıkatsııalaýdy qolǵa alyp, týrısterdi tartý núktelerin qurý kerek, bul murajaılar, galereıalar, sport ortalyqtary. Ekinshiden, aıyna halyqaralyq aýqymdaǵy 2-3 sharany jáne aımaqtyq sharalardy ótkizýdi qamtamasyz etý qajet. Úshinshiden, túrli mádenı jáne sporttyq sharalardy ótkizý maqsatymen salynǵan sporttyq jáne mádenı nysandardy kommertsııalandyrý qajet», - dedi Isekeshev.

Astanany tabysty jahandyq qalaǵa transformatsııalaý úshin halyqaralyq qarjy ortalyǵyn sátti iske qosý kerek, dep esepteıdi elorda ákimi.

«Bul jerde biz AHQO-men birlesip jumys isteımiz. «Smart Astana» jobasyn iske asyrý týraly jeke atap ótkim keledi. 2016 jyly kóp jumys jasaldy, jańa jaǵdaılarǵa beıimdelgen jańa tujyrymdama jasaldy, negizgi smart-jobalar anyqtaldy. 2017 jyly osy protsesti kúsheıtip, tez arada nátıje berip, oń áleýmettik áserge alyp keletin basty jobalardy iske asyrý qajet», - dep atap kórsetti Isekeshev.

Negizgi jobalardyń qatarynda beınebaqylaý, kósheni jaryqtandyrý, smart-mektep, balalardy balabaqshalarǵa avtomatty túrde bólý, smart emhana, turǵynnyń biryńǵaı kartasy, E-KSK jáne basqalar.

Osy orıda qala ákimi árbir joba boıynsha egjeı-tegjeı jospar jasap, olardy iske qosýdy tapsyrdy, Astana Innovations-ke barlyq jobalar boıynsha jumystardy úılestirip, konsýltatıvtik súıemeldeýdi júktedi.

«Osylaısha, aldaǵy damý perspektıvalarynyń kórinisi ınfraqurylymdyq jobalardy iske asyrýda bıýdjetten tys qarjy kózderin paıdalanýǵa, ekonomıkanyń eksporttyq áleýeti bar saýda sektorlaryn damytýǵa jáne Astanany týrısterdi, kapıtaldy jáne ınnovatsııalardy tartý ortalyǵy retinde qalyptastyrýǵa baǵdarlanǵan», - dep qorytyndylady Á. Isekeshev.