Astana ákimdiginiń ókili orys tilinde ǵana aqparat bergeni úshin eskertý estidi

ASTANA. KAZINFORM — Astana qalasy Ekonomıka jáne bıýdjettik josparlaý basqarmasynyń basshysy Aıjan Túgelbaeva qoǵamdyq keńes otyrysynda orys tilinde ǵana málimet bergeni úshin eskertý estidi. 

2025 jylǵy qala bıýdjetin naqtylaý jobasyn tanystyrǵan ákimdik ókili baıandamasyn orys tilinde tanystyrǵan. Qoǵamdyq keńes músheleri jazbasha usynylǵan málimettiń bári de tek orys tilinde ekenin aıtyp, sheneýnikti til saıasatyn qurmetteýge shaqyrdy.

— Úshinshi saılanǵan qoǵamdyq keńeste kelisken bolatynbyz. Baıandamańyzdy qaı tilde sóıleseńiz de ózińiz bilesiz. Oryssha sóıleseńiz, qazaqsha jazbasha mátin bolsyn. Al qazaqsha sóıleseńiz, oryssha mátin bolsyn dep kelisip edik. Endi ózińiz kelip oryssha sóıledińiz, slaıdtyń bárin oryssha kórsettińiz. Qazaq tili, memlekettik til qaıda? Áleýmettik múddelerdi qorǵaý komıssııasynyń tóraǵasy retinde osyndaı talabym bar. Bul osynda basqarmalardyń bárine qatysty. Oryssha sóıleseńiz de qarsy emespiz. Biraq jazbasha málimet qazaqsha bolý kerek. Til saıasatyn qurmetteýlerińizdi ótinemin, — dedi qoǵamdyq keńes múshesi Kárimbek Qurmanálıev.

Bul syndy jıynnyń moderatory da qoldady. Al Aıjan Túgelbaeva «synyńyz qabyldandy» dep qysqa jaýap qaıyrdy.

Sondaı-aq, atalǵan jıynda Astana ákimdigi taǵy da skverge qajetti jer satyp alýǵa bıýdjetten aqsha surap otyrǵany málim boldy.