Astana ákimdiginiń qyzmetkerlerine qatysty qylmystyq is toqtatyldy
ASTANA. KAZINFORM – Elorda ákimdiginiń qyzmetkerlerine qatysty jer jáne sáýlet-qala qurylysy zańnamasy salasynda kóptegen zańbuzýshylyq anyqtalǵannan keıin bastalǵan qylmystyq is toqtatyldy.
«2023 jylǵy 15 jeltoqsanda tergeý nátıjesi boıynsha Sybaılas jemqorlyqqa qarsy is-qımyl agenttiginiń Astana qalasy boıynsha departamenti Qylmystyq is júrgizý kodeksiniń 35 - baby 1-bóligi 2-tarmaǵynyń negizinde, ıaǵnı qylmystyq quqyq buzýshylyq quramynyń bolmaýyna baılanysty qylmystyq isti toqtatý týraly sheshim qabyldaǵanyn habarlaımyz», - delingen qala prokýrorynyń orynbasary Erjan Berdibekovtiń Kazinform agenttiginiń resmı saýalyna bergen jaýabynda.
Esterińizge sala keteıik, ótken jyly Astana prokýratýrasy ákimdikke tekserý júrgizgen bolatyn. Nátıjesinde josparlaý jobasyn túzetý, memlekettik jerlerdi berý, jobalaý-izdestirý jumystaryna ruqsat berý, sondaı-aq eskızdik jobalardy kelisý týraly sheshimder qabyldaýǵa baılanysty buzýshylyqtar anyqtaldy.
Tekseris materıaldary qala ákimdiginiń qyzmetkerlerine qatysty QR Qylmystyq kodeksiniń 361-baby (laýazymdyq ókilettikterdi asyra paıdalaný) boıynsha Antıkorǵa tekserýge jiberildi jáne odan ári qylmystyq is qozǵaldy.
Buǵan deıin BAQ-ta 2019-2022 jyldar aralyǵynda jer ýchaskelerin berýge jáne qalada qurylys salýǵa jaýapty Astana ákimdiginiń bólimshelerin tekserý týraly habarlanǵan bolatyn. Osy kezeńde elorda ákimi Altaı Kólginov boldy.
Prokýratýra bastapqyda ondaǵan mektep, aýrýhana men balabaqsha salý josparlanǵan ýchaskeler úshin josparlaý jobasyn túzetýdiń 61 jaǵdaıyn anyqtady. Biraq onyń ornyna turǵyn úıler men elıtalyq jyljymaıtyn múlik salynǵan.
