Astana ákimdiginiń JOLTAP jobasy bilikti jumysshy mamandardy daıarlaıdy
«Halyq» qaıyrymdylyq qory Astana qalasy ákimdiginiń «JOLTAP» áleýmettik jobasyn júzege asyrý jónindegi bastamasyn qarjylaı qoldady, dep habarlaıdy Kazinform.
«JOLTAP» jobasy aıasynda elorda turǵyndary kóp shoǵyrlanatyn aýmaqtarda «Barshaǵa múmkindik» ataýymen 10 modýldik pýnkti esigin aıqara ashty. Modýldik pýnkt keńesshileri turǵyn úı baǵdarlamalary, bıznes granttary, áleýmettik kómekter jáne jumysqa ornalasý múmkindikteri týraly aqparattar beredi. Modýldik pýnktter jumys istegen bir jarym aıda 52 memlekettik qoldaý sharacy boıynsha ákimdikke 3 myńnan astam adam kómek surap júgindi. 720 adam kásip ashý úshin qaıtarymsyz qarjylaı qoldaý men shaǵyn nesıe alýǵa ótinish bildirdi.
Joba Memleket basshysynyń tapsyrmasyn oryndaý maqsatynda Astana qalasy ákimdiginiń bastamasymen júzege asyrylýda jáne azamattarǵa tabysyn arttyrý múmkindikterin tańdaýda kómektesýge jáne kómek kórsetýge baǵyttalǵan. Jobanyń quraldary tutastaı alǵanda júrgizilip jatqan áleýmettik reformalardyń tıimdi qosymshasy bolyp tabylady.
JOLTAP jobasy aıasynda qala turǵyndary eki qysqa merzimdi baǵdarlama boıynsha tegin bilim ala alady. Birinshi baǵdarlama tiginshi, kassır sııaqty saýda, qurylys jáne qyzmet kórsetý salalaryndaǵy sala jetekshileriniń standarttary men talaptaryn negizge ala otyryp, bilikti jumysshy mamandardy daıyndaýǵa arnalǵan. «Freelance Múmkindik» dep atalatyn ekinshi baǵdarlama naryqta suranysqa ıe jáne tanymal tsıfrlyq daǵdylardy oqytýdy qarastyrady.
JOLTAP jobasynyń arqasynda Astanada 10 myńnan astam halyq tsıfrlyq salanyń sertıfıkattalǵan bilikti mamanyna aınalady. Joba – memleket, bıznes jáne qoǵamnyń birlesken kúsh-jigerimen qurylǵan tıimdi júıe.
«Halyq» qaıyrymdylyq qory kóp jyldardan beri áleýmettik máselelerdi sheshýge jáne halyqtyń múmkindikterin jaqsartýǵa basa nazar aýdaryp keledi. Jalpy, «Halyq» qorynyń 2016 jyldan bergi qyzmeti barysynda qamqorshylar Tımýr men Dınara Qulybaevtardyń arqasynda halyqty áleýmettik qorǵaý, áleýmettik ınfraqurylymdy damytý, bilim berý jáne buqaralyq sport salalarynda jalpy quny 50 mıllıard teńgege jýyq 100-den astam joba júzege asyryldy.
