Astana ákimdiginen 20 mln teńge: Uldana Myrzýannyń kúıeýi ony qaıda jumsaǵanyn aıtyp berdi
ASTANA. KAZINFORM – Uldana Myrzýannyń qazasyna qatysty sotta onyń kúıeýi Ádilet Zeınelden jaýap alý jalǵasyp jatyr. Sot otyrysynda ol Uldana qaıtys bolǵannan keıin otbasynyń Astana ákimdiginen alǵan 20 mln teńgesi týraly aıtyp, keıin jábirlenýshi mártebesinen ne sebepti bas tartqanyn túsindirdi.
Á.Zeıneldiń aıtýynsha, 2025 jylǵy 19 qarashada, Uldana Myrzýandy jerlegennen keıin ony marqumnyń týǵan ápkesi Aqnurmen birge Astana ákimdigine shaqyrǵan. Kezdesýge qala ákimi, onyń orynbasary jáne máslıhat depýtaty qatysqan.
Otbasyna 20 mln teńge kóleminde qolma-qol aqsha berilgen. Ádilettiń aıtýynsha, aqshany alǵany týraly eshqandaı qolhat nemese ózge qujatqa qol qoımaǵan.
Jábirlenýshiniń aıtýynsha, keıin bul qarajat birneshe maqsatqa jumsalǵan. Shamamen 9,2 mln teńge avtokólik nesıesin óteýge baǵyttalǵan. Banktiń aldyn ala málimeti boıynsha, taǵy 4,3 mln teńge Uldananyń nesıe boıynsha mindettemelerin óteýge jumsalǵan. Budan bólek, 4,5 mln teńge onyń anasyna berilgen. Qalǵan qarajat túrli shyǵyndarǵa, sonyń ishinde qaıyrymdylyqqa jumsalǵan.
Sonymen birge, sot otyrysynda Ádilet Zeıneldiń jábirlenýshi mártebesinen bas tartqany da belgili boldy. Sýdıa onyń mundaı sheshimge ne sebep bolǵanyn surady.
Á.Zeınel qaıǵyly oqıǵadan keıin jańa ómir bastaǵanyn jáne budan bylaı Uldananyń múddesin onyń anasy qorǵaǵanyn qalaıtynyn jetkizdi.
— Men jańa ómir bastadym, úılendim. Budan ári Uldananyń múddesin onyń anasy qorǵaǵanyn qalaımyn. Ózi de buǵan deıin BAQ-qa bergen suhbatynda da jábirlenýshi mártebesinen bas tartýymdy aıtqan bolatyn, — dep túsindirdi Ádilet Zeınel.
Sýdıa Ádilettiń jábirlenýshi mártebesinen óz erkimen bas tartqan-bas tartpaǵanyn da naqtylady. Jábirlenýshi bul mártebede óz erkimen bolǵanyn jáne odan bas tartýdy josparlamaǵanyn rastady.
Buǵan deıin Ádilet Zeınel áıelimen ótken sońǵy saǵattar týraly aıtyp bergen edi.
