Astana ákimdigi JEO-lardy antıdronmen jabdyqtaýǵa bıýdjetten aqsha bólmeıtin boldy

ASTANA. KAZINFORM — Astana qalalyq máslıhatynyń depýtaty Azamat Aıtqojın elordadaǵy jylý-elektr ortalyqtaryn dron shabýylyna qarsy keshenmen jabdyqtaýǵa bıýdjetten aqsha bólýden bas tartýdy usyndy.

— 2-3 kún bolyp qaldy, osy máseleni talqylap jatyrmyz. Terrorızmge qarsy komıssııanyń 22 mamyryndaǵy qaýlysy bar. Onda antıdrondar (dron shabýylyna qarsy qorǵanys kesheni) satyp alý kerektigi aıtylǵan. Kommýnaldyq sharýashylyq basqarmasyna bıýdjetten aqsha taptyq. Biraq qazir Jylý-elektr ortalyqtaryn jabdyqtaý máselesi ózekti bolyp tur. Bulardyń bári strategııalyq mańyzy bar nysandar ekenin bilesizder. Bir antıdronǵa sonshalyq úlken soma kerek emes, shamamen 20 mln teńge bolady. Qandaı da bir JEO-ǵa 2 nemese 4, tipti 6-8 antıdron kerek bolsa da, ony bıýdjetten almaýymyz kerek. Ol ortalyqtardyń óz aktsıonerleri bar. Solar satyp alyp, jaraqtandyrsyn. Osy máseleni erekshe baqylaýǵa alsańyzdar, — dedi depýtat máslıhat otyrysynda.

Energetıka basqarmasynyń basshysy Nurlan Kópeshov máseleni bıýdjet esebinen sheshý tym uzaqqa sozylatynyn aıtty.

— Iá, Terrorızmge qarsy komıssııanyń strategııalyq nysandardy bıýdjet esebinen antıdronmen jabdyqtaý týraly sheshimi bar. Biraq «Astana-Energııa» aktsıonerlik qoǵamy sharýashylyq júrgizý quqyǵyndaǵy respýblıkalyq memlekettik kásiporyn emes. Sondyqtan bul óte uzaq protsess bolady. Qazir pysyqtap jatyrmyz, — dedi ol.

Qala ákiminiń birinshi orynbasary Nurlan Nurkenov sharýany kásiporynnyń esebinen sheshý múmkindikterin qarastyrýdy tapsyrdy.

— Bul jerde sizderge óz kúshterińizge úmit artý kerek dep oılaımyn. Múmkindikterińiz bar. Jergilikti bıýdjet esebinen bárin sheshý múmkin emes. Sondyqtan sizden jáne áriptesterińizden bul máseleni kásiporyn bıýdjetinen sheshý jaǵyn qarastyrýdy suraımyn, — dedi ákimniń orynbasary.

Aıta ketý kerek, Astanadaǵy jylý-elektr ortalyqtary «Astana Energııa» AQ-ǵa qaraıdy.