Astana ákimdigi Ulttyq panteondy kútip ustaıtyn memlekettik mekeme qurmaqshy

Qalalyq máslıhattyń turaqty komıssııasy bıyl ákimdiktiń kommýnaldyq menshiginen jekeshelendirýge beriletin nysandardyń tizimin talqylady. Atalǵan tizimde «Astana arnaıy qyzmet kórsetý bıýrosy» JShS de bar.

Qalalyq kommýnaldyq sharýashylyq basqarmasynyń basshysy Erlan Syzdyqov atalǵan nysan 10 jyldan astam ýaqyt boıy halyqqa úzdiksiz rıtýaldyq qyzmet túrlerin kórsetip kele jatqanyn aıtty.

- Onyń negizgi fýnktsııalary – beıitterdi kútip ustaý, týysqany jáne izdeýshisi joq azamattardy jerleý, bıologııalyq qaldyqtardy kómý. Astana qalasynda 28 zırat bar. Sonyń 14-inde osy seriktestik qyzmet kórsetedi. Aktıvtiń balans quny – 184 mln teńge. Kásiporynnyń qarjylyq sharýashylyǵy turaqty. Salyǵyn únemi tólep turady, memlekettik satyp alýlarǵa qatysady. Osydan onyń qalypty jumys istep turǵanyn kórýge bolady. Degenmen Úkimet qaýlysy boıynsha seriktestiń jekeshelendirýge jatatyn nysandar tizbesine engizilgen, - dedi ol.

Máslıhat depýtaty Baýyrjan Smaıylov mundaı áleýmettik turǵyda mańyzdy nysandy ákimdik óz balansynda saqtap qalý kerek degen usynys aıtty.

- Mekeme jeke menshikke berilse, ıesi basty nazardy tabys tabýǵa burady. Sol kezde adam jerleýge beriletin telimder qymbattap ketip júrmeı me, - dep surady ol.

Erlan Syzdyqov bıýrony ákimdik qaramaǵynda qaldyrý týraly usynysty Básekelestikti qorǵaý jáne damytý agenttigi maquldamaı qoıǵanyn aıtty.

- Olar jekeshelendirý kerek degen sheshim aıtty. Astanada mundaı qyzmet túrin kórsetetin 9 jekemenshik kásiporyn bar. Sondyqtan básekeli ortaǵa jiberý kerek dep túsindirdi. Jer telimderiniń baǵasyna kelse, zırat aýmaqtary aýdandyq ákimdikterdiń menshiginde. Demek jer telimin úlestirý fýnktsıonaly aýdandyq ákimdikte qalady. Qyzmet kórsetý bıýrosy týysy joq azamattardy jerlep, beıitterge sanıtarııalyq tazalyq júrgizýge ǵana qatysady, - dedi basqarma basshysy.

Erlan Syzdyqov Astananyń mártebesi týraly Konstıtýtsııalyq zańǵa túzetýler men tolyqtyrýlar jobasy pysyqtalyp jatqanyn depýtattardyń esine saldy.

- Biz osy qujatqa Ulttyq panteonǵa qyzmet kórsetý máselesi boıynsha aralasyp jatyrmyz. Sol panteonǵa qaraıtyn bir mekeme bekitilý kerek degen usynys aıttyq. Bul derbes memlekettik mekeme bolý kerek, - dedi ákimdik ókili.

Aıta ketý kerek, Astananyń mártebesin aıqyndaıtyn Konstıtýtsııalyq zań jobasy «Ashyq NQA» portalynda talqylaýǵa shyǵarylǵan. Qujat 1 shildege deıin búkil protsedýralardan ótip, kúshine ený kerek.