Elorda ákimdigi Taldykól mańyndaǵy beton zaýyty týraly aqparatty teriske shyǵardy
ASTANA. KAZINFORM — Taldykól mańynda beton zaýyty salynyp jatyr degen aqparat shyndyqqa sáıkes kelmeıdi. Bul týraly Kazinform agenttiginiń resmı saýalyna jaýap bergen Astana qalasynyń sáýlet, qala qurylysy jáne jer qatynastary basqarmasy habarlady.
Vedomstvo málimetinshe, Kishi Taldykólge jaqyn ornalasqan aýmaqta ónerkásiptik emes, turǵyn úı kesheni salynýda. Joba aıasynda kommertsııalyq úı-jaılar men parkıng qarastyrylǵan.
Detaldy josparlaý jobasyna sáıkes, «Nura» turǵyn alabynda, E-908 kóshesiniń boıynda ornalasqan №20 jer ýchaskesinde kópqabatty turǵyn úı salý kózdelgen. Qurylysqa ruqsat 2021 jylǵy 2 maýsymdaǵy qaýlymen berilgen. Jer telimi 2026 jylǵy 2 maýsymǵa deıin jalǵa usynylǵan.
Sonymen qatar, tapsyrys berýshi 2021 jylǵy 30 qyrkúıekte arhıtektýralyq-josparlaý tapsyrmasyn (AJT) alǵan. Eskızdik joba 2024 jylǵy 1 qarashada maquldanǵan.
Atalǵan qujattar jobalaýǵa jáne saraptamadan ótýge qajetti rásimder qatarynda. Alaıda ákimdik qazirgi tańda nysanǵa qatysty jobalyq-smetalyq qujattama (JSQ) týraly aqparatqa ıe emes ekenin atap ótti. JSQ-ny ázirleý jáne saraptamadan ótkizý «Memlekettik vedomstvodan tys saraptama» sharýashylyq júrgizý quqyǵyndaǵy respýblıkalyq memlekettik kásipornynyń quzyrynda. Bul mekeme QR Indýstrııa jáne qurylys mınıstrligine baǵynysty.
Sondaı-aq, qala ákimdigi nysanǵa júrgizilgen monıtorıng barysynda birqatar buzýshylyqtar anyqtalǵanyn habarlady. Tekserý nátıjeleri boıynsha tıisti hattar Astana qalasynyń qalalyq ortany baqylaý jáne sapa basqarmasyna, sondaı-aq jer resýrstaryn basqarý departamentine joldanǵan.
Buǵan deıin Kishi Taldykól sýyn aǵyzý faktisi boıynsha tekserý júrgizilip jatqany habarlanǵan bolatyn.