Astana ákimdigi taǵy da skverge qajetti jer satyp alýǵa bıýdjetten aqsha surap otyr

ASTANA. KAZINFORM — Astana ákimdigi skverge qajetti jer satyp alýǵa bıýdjetten aqsha surap otyr. Bul týraly qalalyq qoǵamdyq keńestiń otyrysynda Ekonomıka jáne bıýdjettik josparlaý basqarmasynyń basshysy Aıjan Túgelbaeva málim etti. 

Basqarma basshysy 2025 jylǵa bekitilgen qala bıýdjetine qurylys salasy boıynsha ǵana qosymsha 32 mlrd teńge kerek ekenin aıtty.

Onyń ishinde Qaraótkel turǵyn alabynda, Qabanbaı Batyr, Buqar jyraý, E522, E679, E682 kóshelerinde 9 mektep salý jobasy da bar.

Sondaı-aq, Aıjan Túgelbaeva qurylysqa qajetti jer telimderin satyp alýǵa qosymsha aqsha kerek ekenin aıtty.

— Baspana jáne turǵyn úı ınspektsııasy basqarmasyna qosymsha 7 mlrd 714,5 mln teńge bólindi. Onyń ishinde memleket qajettiligi úshin bilim berý nysandaryn, jol-kólik ınfraqurylymy men skverler salýǵa arnalǵan jer telimin alyp qoıýǵa 7,5 mlrd teńge kózdelgen, — dedi ol.

Buǵan deıin Astana ákimdigi 176 mln teńgege satylǵan jerdi qaıtadan 1,08 mlrd teńgege satyp almaqshy bolǵanyn jazǵan edik.  Keıin bul qoǵamda daý týǵyzyp, ákimdik bul sheshimnen bas tartqanyn málim etken edi.