Astana ákimdigi sońǵy qońyraýǵa qatysty jelide taraǵan aqparatqa túsinik berdi

ASTANA. KAZINFORM — Astana qalasynyń ákimdigi mektep túlekterine arnalǵan sońǵy qońyraý is-sharasyn ótkizýge qatysty resmı túsinikteme berdi.

— Áleýmettik jelide mektep bitirýshi túlekter úshin saltanatty is-sharalar ótkizilmeıdi degen aqparat tarap jatyr. Osyǵan oraı, atalǵan aqparattyń shyndyqqa sáıkes kelmeıtinin resmı túrde habarlaımyz. Mektep bitirýshi túlekterge arnalǵan saltanatty is-sharalar dástúrli formatta ótkiziledi. Túlekterge lenta taǵýǵa, estelik sýretke túsýge, mektep valsin bıleýge ruqsat etiledi, — delingen habarlamada.

Degenmen ákimdik artyq shyǵynǵa batyp, ysyrapqa jol bermeýge shaqyryp otyr. 

— Barlyq túlekke qaýipsiz jáne teń jaǵdaı jasaý maqsatynda asta-tók saltanatty kesh ótkizýdi, qarajat jınaýdy, avtokólikpen serýendeýdi jáne osyǵan uqsas ózge de is-sharalardy ótkizýdi usynbaımyz, — deıdi ákimdikten.

Buǵan deıin jelide astanalyq mektep túlekteriniń sońǵy qońyraý saltanatty is-sharasyn ótkizý máselesi qyzý talqylanyp jatqany týraly habarlaǵan edik. Oǵan sońǵy qońyraýda vals bıleýge, lenta taǵýǵa tyıym salynatyny týraly jazba sebep boldy. 

Eske salaıyq, ótken jyly Oqý-aǵartý mınıstri Ǵanı Beısembaev sońǵy qońyraý kezinde ata-analar mekteptegi merekelik is-sharalarǵa shyǵyndalyp, balalardy ysyrapqa úıretpeýi kerektigin aıtty.