Astana ákimdigi nelikten Tımýr Qulybaevtyń kompanııasyn sotqa berdi

ASTANA. KAZINFORM — Astana qalasynyń aýdanaralyq ekonomıkalyq soty elordanyń jer resýrstary basqarmasynyń «Kıpros» JShS-ne jerdi májbúrlep alyp qoıý týraly talabyn qanaǵattandyrdy.

Astana qalasy Almaty aýdany prokýratýrasynyń usynysy boıynsha elordanyń jer resýrstary basqarmasy «Kıpros» JShS-ne qarasty jerlerdiń uzaq ýaqyt paıdalanbaý faktisi boıynsha tekserý júrgizgen.  

Tekserý qorytyndysy boıynsha kompanııa zańbuzýshylyqtardy joıý týraly nusqama alǵan. 

«Nusqama talaptaryn oryndamaýyna baılanysty vedomstvo „Kıpros“ JShS menshik ıesinen jer ýchaskelerin alyp qoıý jóninde aryz berdi», — delingen Aýyl sharýashylyǵy mınıstrliginiń Kazinform agenttigi joldaǵan saýalǵa jaýabynda. 

Osylaısha 2024 jylǵy 19 shildede Astana qalasynyń aýdanaralyq ekonomıkalyq soty atalǵan kompanııaǵa tıesili aýyl sharýashylyǵy maqsatyndaǵy jerdi májbúrlep alyp qoıý týraly elordanyń jer resýrstary basqarmasynyń talabyn qanaǵattandyrdy. 

Sondaı-aq, vedomstvodan «Kıpros» JShS qalalyq sottyń sheshimine apellıatsııalyq shaǵym túsirýi múmkin ekenin habarlady. 

Aıta keteıik, «Kıpros» JShS-niń jalǵyz quryltaıshysy — qazaqstandyq kásipker Tımýr Qulybaev.

Kompanııa 1994 jyldyń qazan aıynda tirkelgen.

2015-2023 jyldar aralyǵynda kompanııa 13,1 mlrd teńge salyq tólegen, al eń joǵary kórsetkish 2023 jyly tirkeldi (2,2 mlrd teńge).