Astana ákimdigi merdiger kompanııalarǵa Turan, Respýblıka dańǵyldaryn qaıta jóndetýi múmkin

ASTANA. KAZINFORM – Astana qalalyq máslıhatynyń depýtaty Vladıslav Sergeev elordadaǵy Turan jáne Respýblıka dańǵyldarynyń eki jyl ótpeı jatyp qaıta jóndeýge qajet etetin halge túskenin másele etip kóterdi.

- Bıýdjetti naqtylaý jobasyndaǵy jol jóndeýge qarastyrylǵan somalardy qoldaımyz. Óıtkeni turǵyndardyń ómir sapasy jol sapasyna da baılanysty. Eki jyl buryn jol sapasyn qadaǵalaıtyn ortalyqpen kelisimshart ornatqan kezde jaǵdaıdy túzep alamyz dep úmit artqan edik. Biraq ótken sessııa otyrysynda men sol ortalyqtaǵylardan joldardy kepildik boıynsha jóndeýdiń naqty merzimin bekitýdi suradym. Óıtkeni Turan dańǵyly men Respýblıka dańǵylyn eki jylǵa jetpeıtin ýaqyt buryn jóndegen bolatyn. Al qazir sol joldar naýalanyp ketken. Az ýaqyt ótse de sapasyz kúıge túsken. Meniń paıymdaýymsha, ony kepildik merziminiń aıasynda merdiger kompanııanyń esebinen jóndetýge bolady. Sessııaǵa deıin merzimi týraly aqparatty bergen joq. Sonda da kepildik merziminiń aıasynda jóndetip úlgerýge kúsh salǵan durys. Áıtpegende jol jóndeýdiń tuıyqtalǵan sheńberine qamalatyn túrimiz bar. Áıtpese eki jyldan keıin jóndelgen joldar jaramsyz kúıge túsip jatyr. Oǵan taǵy bıýdjettiń qomaqty aqshasyn jumsaımyz. Osylaı jalǵasa beretin túri bar, - dedi depýtat máslıhat sessııasynda.

Astana qalasy ákiminiń birinshi orynbasary Nurlan Nurkenov atalǵan eki dańǵyldyń máselesin ózi qadaǵalaýǵa ýáde berdi.

- Biz qazir sapa ortalyǵymen jumys isteımiz. Jol jóndeý, jol salý jobalarynyń bári keıingi úsh jyldan beri mindetti túrde sapa ortalyǵynyń maquldaýynan ótkizilip júr. Budan bólek jumysta qoldanylatyn bıtýmnyń sapasymen baılanysty másele bar shyǵar. Keıde merdigerlerdiń jaýapkershiligi aqsap jatqan shyǵar. Siz aıtqan eskertpelerdi baqylaýyma alyp, jeke málimetin berem, - dedi ol.

Eske salsaq, Turan dańǵylynyń birneshe bóligi bıyl jazda da kúrdeli jóndeýden ótti.