Astana ákimdigi kóshelerdi sý alý problemasyn 2035 jylǵa deıin túbegeıli sheshpek

ASTANA. KAZINFORM – Astanada jańbyr jaýsa kóshelerdi sý basýy — qala turǵyndary sheshimin kútip júrgen ózekti másele. Qala ákimdigi osy keleńsiz jaǵdaıdy retteý úshin qandaı jumystar atqarylyp jatqanyn málimdedi.

Qala ákimdigi keltirgen derekterge súıensek, qazir elordanyń jaýyn sýyn jınaıtyn káriz júıesi 18 tazartý nysanynan jáne 1 jınaqtaýshy toǵannan, 610,8 km nóser, drenaj jáne aryq-naýa káriz jelisiniń magıstraldyq kollektorlarynan turady. Olar 16,7 myń gektardan asatyn aýmaqtaǵy jerústi aǵyn sýyn burýdy qamtamasyz etedi.

Jerústi aǵyn sýyn burýdy qamtamasyz etý jumystaryn «Elorda eco system» uıymy júrgizedi.

Sondaı-aq jergilikti atqarýshy organ bas qalada jaýyn sýynyń káriz júıeleri men tazartý qurylystaryn salý boıynsha birqatar jumys atqarylyp jatqanyn atap ótken.

«Máselen, 2019 jyldan 2023 jylǵa deıingi kezeńde qalada nóser, drenaj jáne naýa-aryq káriz jelisiniń magıstraldyq kollektorlarynyń 400 km-den astam jelisi, 9 sorǵy stantsııasy jáne 4 tazartý qurylysy salyndy jáne rekonstrýktsııalandy. 2023 jyly nóserli káriz júıelerin salý boıynsha úsh jobany iske asyrý aıaqtaldy, onyń sheńberinde 10 km-den astam magıstraldyq jáne taratýshy nóserli káriz kollektorlary salyndy», - delingen elorda ákimdiginiń Kazinform-ǵa jaýabynda.

Odan bólek, bıyl jaýyn sýy káriziniń 5 jobasy boıynsha jumys júrip jatqany aıtyldy. Onyń 3-eýi jýyrda tapsyrylmaq. Osy jobalar aıasynda 5 km-den astam kollektor salynyp, jańa temirjol vokzaly aýmaǵynda tazartý qurylysynyń jumysy aıaqtalady.

Sondaı-aq habarlamada Astana qalasynda káriz júıesin damytý negizdemesi ázirlenetini jaıly málimet keltirilgen.

«Jaýyn sýy jınalatyn káriz jelileri men qurylystarynyń 8 obektisin jobalaý júrgizilip jatyr. Odan bólek qazirgi ýaqytta «Astana qalasynda 2035 jylǵa deıin nóserli káriz júıesin damytý» tehnıkalyq-ekonomıkalyq negizdemesi ázirlený ústinde», - dep jazylǵan jaýapta.