Astana ákimdigi keshe áskerı sherýge kire almaǵan tyl ardagerinen keshirim surady
ASTANA. KAZINFORM — Tyl ardageri Teńdik Izaqovtyń áskerı sherýge kire almaı turǵan vıdeosy keshe áleýmettik jelilerde jeldeı esip, tarap ketti.
Búgin aqsaqaldan Astana ákimdigi keshirim surap, kóp jylǵy eńbegi úshin alǵys aıtqany belgili boldy.
Qala ákimdigi baspasóz qyzmetiniń málimetinshe, Jumyspen qamtý jáne áleýmettik qorǵaý basqarmasynyń basshysy Ilıa Skýb, qalanyń Іshki saıasat basqarmasynyń basshysy Nurdáýlet Álmuhanov tyl eńbekkeri professor Teńdik Izaqovpen jáne onyń otbasymen kezdesip, kóp jylǵy eńbegi úshin alǵys bildirip, 7 mamyr kúni sherý ótetin orynǵa kire almaǵany úshin keshirim suraǵan.
— Іs-shara aýmaǵyna ótý arnaıy ázirlengen tizim boıynsha júzege asyryldy. Oryn sanynyń shektelýin, sondaı-aq ardagerlerdiń jasy ulǵaıǵanyn eskere otyryp, tizim ardagerler men tyl eńbekkerleriniń týystarynan tikeleı túsken ótinishter boıynsha ǵana ázirlendi, — dep túsindirdi ákimdikten.
Bul rette sherýge elimizdiń barlyq óńirinen ardagerler men tyl eńbekkerleri qatysty. Teńdik Izaqovtyń otbasynan ótinish túsken joq.
Ákimdik Teńdik Izaqov pen onyń jaqyndarynan týyndaǵan jaǵdaıǵa baılanysty shyn júrekten keshirim surap, qarııany 9 mamyr kúni gúl shoqtaryn qoıý rásimine shaqyrǵan.
Eske sala keteıik, keshe 7 mamyr Otan qorǵaýshy kúni merekesine oraı Astanada áskerı sherý ótken bolatyn.