Astana ákimdigi kadr daıarlaýǵa 1 087 bilim berý grantyn bólmek
ASTANA. KAZINFORM – Astana ákimdigi bıyl joǵary jáne joǵary oqý ornynan keıingi bilimi bar kadrlardy daıarlaýǵa 1 087 bilim berý grantyn bólmek. Bul týraly Astana qalalyq bilim basqarmasynyń basshysy Qasymhan Senǵazıev aıtty.
«Kadr tapshylyǵyn joıý úshin qala ákimdigi jyl pedagogıkalyq, medıtsınalyq mamandyqtar boıynsha, sondaı-aq gýmanıtarlyq baǵyt boıynsha joǵary jáne joǵary oqý ornynan keıingi bilimi bar kadrlardy daıarlaýǵa memlekettik bilim berý tapsyrysyn bóledi. 2024-2028 oqý jyldaryna qala ákimdigi joǵary jáne joǵary oqý ornynan keıingi bilimi bar kadrlardy daıarlaýǵa 1 087 bilim berý grantyn bóldi. Bilim basqarmasynan pedagogıkalyq mamandyqtardyń qajettiligi boıynsha 950 orynǵa bakalavrǵa jáne «Daǵdarys psıhologııasy» magıstratýrasyna 50 orynǵa ótinim bar», - dedi ol Astana qalalyq qoǵamdyq keńesiniń otyrysynda.
Onyń dereginshe, búginde qalada úsh aýysymdy oqytatyn 8 mektep jáne 16 tyǵyzdalǵan mektep bar. Egerde bes jyl buryn qalada jalpy sany 188 841 oqýshy bilim alatyn 91 memlekettik jáne 32 jekemenshik mektep bolsa, 2024 jyly jalpy sany 263 902 oqýshy bar 102 memlekettik jáne 66 jekemenshik mektep jumys istep tur.
«Kontıngenttiń tyǵyzdyǵy máselesi jańa mektepter salý jáne qosymsha ǵımarattar salý arqyly sheshilip keledi. «Jaıly mektep» jobasy aıasynda 2024 jyldyń sońyna deıin 20 400 oqýshyǵa arnalǵan 12 mektep qurylysyn aıaqtaý josparlanǵan. 2750 oryndyq jumys istep turǵan 3 mektepke japsarjaı salý, 1500 oryndyq 2 tıptik mektepter qurylysyn aıaqtaý kózdelgen», - dedi basqarma basshysy.
Qasymhan Senǵazıevtiń atap ótýinshe, Qoǵamdyq densaýlyq saqtaý basqarmasynan 72 orynǵa medıtsınalyq mamandyqtardyń qajettiligi boıynsha ótinim bar. Olar myna mamandyqtar:
- shuǵyl medıtsına – 33 oryn,
- terapııa – 5,
- jalpy hırýrgııa, eresekter onkologııasy – 3,
- oftalmologııa, pedıatrııa, ftızıatrııa, anestezıologııa jáne reanımatologııa, juqpaly aýrýlar, neonatologııa, akýsherlik jáne gınekologııa, otbasylyq medıtsına, otorınolarıngologııa - 2,
- gastroenterologııa, klınıkalyq farmakologııa, neırohırýrgııa, travmatologııa-ortopedııa, fızıkalyq medıtsına jáne ońaltý, endokrınologııa, ıadrolyq medıtsına – 1.
Munan bólek, Dene shynyqtyrý jáne sport basqarmasynan dene shynyqtyrý jáne sport qajettiligi boıynsha 10 orynǵa, Din isteri basqarmasynan ıslamtaný, teologııa, dintaný mamandarynyń qajettiligi boıynsha (magıstratýra) 5 orynǵa ótinim bar.
