Astana ákimdigi bir at sporty keshenin 200 myń teńgege satyp, jańasyn 7 mlrd teńgege satyp alǵan

ASTANA. KAZINFORM — Astana qalalyq máslıhatynyń depýtaty Vladıslav Sergeev «Arǵymaq» at sporty keshenin senimgerlik basqarýǵa berý kózdelip otyrǵanyn aıtyp, ıppoterapııa (tirek-qozǵalysynda aqaý bar adamdardy atqa mingizip ońaltý — red.) qyzmetine muqtaj balalardyń bolashaǵyna alańdaıtynyn bildirdi.

— 2016 jyly aýktsıon arqyly «Tulpar» at sporty kesheni aıtarlyqtaı kúlkili somaǵa — 200 myńdaı teńgege satylǵan bolatyn. Osydan keıin ákimdik aldyńǵy shaqyrylym depýtattaryna «Arǵymaq» atty jańa at sporty keshenin satyp alý máselesimen shyqty. Onyń baǵasy bul kezde 7 mlrd teńge boldy. Sol kezdegi depýtattar korpýsynyń bir bóligi qarsy shyqqanymyzǵa qaramastan, basym daýyspen máseleni qoldaý týraly sheshim qabyldanǵan. Aqyry sol «Arǵymaq» at sporty keshenin satyp aldyq. Meniń qolymdaǵy aqparat boıynsha qazir sol keshendi senimgerlik basqarýǵa bergeli jatyr, — dedi ol máslıhattyń bıýdjetti naqtylaýǵa arnalǵan otyrysynda.

Depýtat senimgerlik basqarýǵa alý tetiginiń kúmándi tustary bolýy múmkin ekenin aıtady.

— Ókinishke qaraı, bıýdjettiń, halyqtyń aqshasyna salynǵan nysandarymyzdy jeke kompanııalarǵa berýdiń osyndaı mehanızmi bar. Sonda olar bizdiń aqshamyzǵa satyp alynǵan nemese salynǵan ǵımaratty basqarýdan aqsha tabady. Menińshe, bul bıýdjettik sharýashylyqty basqarýdyń, bıýdjetti jumsaýdyń sonshalyq tıimdi tásili emes. Sondyqtan osy jaǵdaıdy taǵy bir taldap shyqsa degen ótinishim bar. Óıtkeni o basta atalǵan nysan erekshe balalarǵa ıppoterapııa qyzmetin kórsetý úshin satyp alynyp jatqany, balalardyń bári aqysyz kire alatyny aıtylǵan. Biraq ádette senimgerlik basqarýshy kelgen soń qyzmettiń kóbin aqyly ete bastaıdy, — dedi Vladıslav Sergeev.

Astana qalasy ákiminiń birinshi orynbasary Nurlan Nurkenov bul máseleni pysyqtaý úshin atalmysh kompanııa ókilderimen ózi kezdesetinin aıtty.

— Atshabar máselesin kelsek, áriptesterimnen, onyń ishinde Vasılıı Levıtten (Astana qalasy dene shynyqtyrý jáne sport basqarmasynyń basshysy — red.) senimgerlik basqarýmen baılanysty jaǵdaıdy naqtylaýdy suraımyn. Men sizder bul máseleni pysyqtaǵandaryńyzǵa, senimgerlik basqarýǵa berý basqarý sapasyn aıtarlyqtaı jaqsartatynyna senimdimin. Senimgerlik basqarý qalaı júzege asatynyn taǵy bir pysyqtaý kerek. Senimgerlik basqarýshyǵa alatyndar halyqpen qalaı jumys istemekshi, qyzmetter qanshalyqty aqyly bolady? Osynyń bárin naqtylaý qajet. Nysan senimgerlik basqarýǵa berilip bitken kezde halyq onyń qalaı jumys isteıtinin bilip otyrýy kerek, — dedi ákimniń orynbasary.

Vasılıı Levıt bul másele qazir kelissóz satysynda ǵana ekenin aıtty. 

Nurlan Nurkenov basqarma basshysyna senimgerlik basqarýǵa alǵysy keletin kompanııamen kezdesý uıymdastyrýdy tapsyrdy.

Eske salsaq, «Arǵymaq» at-sporttyq saýyqtyrý kesheni 2022 jyly Respýblıka kúni men Balalar jylyna oraı ashylǵan bolatyn.