Astana ákimdigi 42 mlrd teńgeniń ınfraqurylymdyq jobasy týraly: Bul — memlekettik qupııa
ASTANA. KAZINFORM — Astana ákimdigi Kazinform saýalyna joldaǵan jaýabynda «Internatsıonalnyı» turǵyn alabyndaǵy sý soryp, súzetin úshinshi stansany salýǵa jumsalǵan 42 mlrd teńgeniń qalaı ıgerilgeni týraly egjeı-tegjeıli málimet berýden bas tartty.
Byltyr jazda Astana turǵyndary sý tapshylyǵyn qatty sezinip, «Internatsıonalnyı» turǵyn alabyndaǵy úshinshi sorǵy-súzgi stansa qoldanysqa berilgen bolatyn. Keıin ol nysandy Májilis depýtattary aralaýǵa baryp, jobaǵa «MGQK QazQurylysServıs» AQ bas merdiger retinde tartylǵany, 42 mlrd teńge jumsalǵany málim bolǵan. Degenmen, Memlekettik satyp alý portalynda atalǵan jobanyń konkýrs málimetterin tabý múmkin emes. Sonyń sebebin, jobanyń tehnıkalyq-ekonomıkalyq negizdemesi men smetalyq qujatyn suraǵan redaktsııa saýalyna ákimdik mynandaı jaýap berdi:
«Joba 2014 jyly ázirlengen jáne jobalardyń memlekettik vedomstvodan tys saraptamasynyń oń qorytyndysyn alǵan «2023 jylǵa deıin sýmen jabdyqtaý jáne sý burý júıelerin damytý» bekitilgen tehnıkalyq-ekonomıkalyq negizdemesi negizinde ázirlendi.
Kórsetilgen obektiniń qurylysy qoldanystaǵy zańnama normalaryna sáıkes ázirlengen jáne bekitilgen jobalyq-smetalyq qujattamaǵa sáıkes júrgizildi. Jobanyń qunyn «Jobalardyń memlekettik vedomstvodan tys saraptamasy» RMK-niń attestattalǵan sarapshylary rastady.
Jobany qarjylandyrý respýblıkalyq bıýdjettiń qarajattary esebinen júzege asyryldy.
Jobany iske asyrý sharttary Qazaqstan Respýblıkasynyń sáýlet, qala qurylysy jáne qurylys salasyndaǵy zańnamasynyń talaptaryna sáıkes keledi. Jobany ázirleýshi — «StroıTeh-Master» JShS, bas merdiger — «NGSK KazStroıServıs» AQ. Jobanyń quny kóptegen faktorlarǵa táýeldi.
…Olarda memlekettik qupııalarǵa jatatyn málimetterdiń bolýyna baılanysty tehnıkalyq-ekonomıkalyq negizdeme men jobalyq-smetalyq qujattamany usyný múmkin emes», — delingen Astana qalasy Energetıka basqarmasynyń jaýabynda.
Ákimdik jobanyń merdigeri retinde nege «MGQK QazQurylysServıs» AQ tańdap alynǵanyn túsindirgen.
«Jobanyń áleýmettik mańyzdylyǵyn, 2021 jyly qarjylandyrýdyń bolýyna qaramastan ony múmkindiginshe tezirek júzege asyrý qajettiligin eskere otyryp, qala basshylyǵy bas merdiger retinde tehnıkalyq kúrdeli jobalardy júzege asyrýda tájirıbesi bar kompanııany jetkilikti materıaldyq jáne qarjylyq resýrstarmen qamtamasyz etý týraly sheshim qabyldady.
«Memlekettik satyp alý týraly» Qazaqstan Respýblıkasy Zańynyń 39-babynyń 3-tarmaǵynyń 56-tarmaqshasyna sáıkes merdiger uıym Qazaqstan Respýblıkasy Úkimetiniń 2021 jylǵy 17 shildedegi № 495 QBPÚ (taratylýy shektelgen qyzmettik aqparatty qamtıtyn «Qyzmet babynda paıdalanýǵa arnalǵan» qujat — red.) Qaýlysymen aıqyndalǵan», — dep jazylǵan jaýapta.
