Astana ákimdigi 176 mln teńgege satylǵan jerdi qaıtadan 1,08 mlrd teńgege satyp almaqshy

ASTANA. KAZINFORM — Astana qalasy máslıhatynyń kezekten tys sessııasynda Dostyq dańǵylynyń boıyndaǵy «Kerýen» saýda-oıyn-saýyq ortalyǵynyń janyndaǵy jyldar boıy bos turǵan telimniń aınalasyndaǵy kúmándi áreketter qyzý pikirtalasqa tuzdyq boldy.

Astana qalasy baspana jáne úı ınspektsııasy basqarmasynyń basshysy Ánýar Saıpov jalpy aýdany 3 gektar bolatyn 9 nysandy 2,14 mlrd teńgege satyp alý jobasyn tanystyrdy. 

Memleket qajetine jaratý úshin bıýdjet esebinen satyp alynatyn jer telimderiniń tizbesin talqylaǵan máslıhat depýtaty Asqar Smaǵulov úlken bylyqtyń betin ashty.

— Áli bireýdiń menshiginde turǵan, satyp alynbaǵan jerge skver salyp otyrsyzdar. Bul — bir. Ekinshiden, telim 2022 jyly paıdalanylmaǵany úshin memleket menshigine qaıtarylǵan. Al 2023 jyly aýktsıon arqyly satamyz. 4 aıdan keıin qaıta alyp qoıatyn bolsaq, aýktsıon arqyly satýdyń qandaı qajeti boldy? Aýktsıonda 176 mln teńgege satsaq, endi 1,08 mlrd teńgege satyp alamyz. Qısyny qaıda? Men Bas prokýratýraǵa hat joldaımyn, aýktsıonnyń qanshalyqty zańdy ekenin teksersin. 4 aı buryn memleket menshigindegi jerdi satýdyń qandaı qajeti boldy? Bul ınsaıderlik aqparatty paıdalaný dep oılaımyn. Aýktsıonnyń qorytyndysyna qoryqpaı-aq qarsylyq tanytýǵa bolady. Aýktsıon arqyly 176 mln teńgege satar kezde baǵalaý júrgizdińizder ǵoı. Onda nege 4 aıdyń ishinde telim 5 ese qymbattap shyǵa keldi? Bulaı bolmaý kerek, — dep shúılikti depýtat.

Qala ákiminiń birinshi orynbasary Nurlan Nurkenov áýel basta jeke menshiktegi jerdi memleket menshigine qaıtarǵan Aýyl sharýashylyǵy mınıstrligi ekenin aıtyp, bul máseleniń obektıvti sebepteri barshylyq degen ustanymyn bildirdi.

Biraq depýtattar bul jer telimine skver salý kerek degen turǵyndardyń talaby talaı jyldan beri aıtylyp kele jatqanyn ákimdik ókilderiniń bilmeýi múmkin emes degen ýáj aıtty. 

— Bul jerdegi táýekel mynandaı bolǵan. Jerdiń qazirgi ıesi ony Aýyl sharýashylyǵy mınıstrliginen satyp aldy. Endi ári qaraı jer ıesi sotqa júgine otyryp, ol orynǵa skver emes túngi klýb nemese kópqabatty turǵyn úı salýǵa talaptanýy múmkin edi. Árıne, turǵyndarmen kezdesken saıyn bul orynda skver bolý kerektigin aıtyp júrgeni ras. Sondyqtan skver uıymdastyrý týraly sheshim qabyldaǵanbyz. Ol úshin qoǵamdyq tyńdaý da ótkizildi. Jaǵdaı osyndaı, — dedi Nurlan Nurkenov.

Depýtat Vladıslav Sergeev áriptesi Asqar Smaǵulovtyń ýájin qoldap, bul aýktsıonǵa quqyqtyq baǵa berý kerektigin aıtty.

— Bul máseleniń túbi shıki dep esepteımin. Erteń búkil jaýapkershilik depýtattardyń moınynda qalaıyn dep tur. 146 mln teńgege satylǵan jerdi bir jyl ótpeı jatyp qaıta 1 mlrd teńgege satyp alý tym kúmándi. Sondyqtan búgin bul telimdi 1,08 mlrd teńgege satyp alý arqyly memleket qajettigi úshin alyp qoıý týraly usynysty keri qaıtarý kerek dep oılaımyn. Quqyqtyq baǵa berilgennen keıin ǵana qandaı da bir sheshim qabyldaý kerek, — dedi depýtat.

Bul usynysty ákimniń birinshi orynbasary da quptady. Osylaısha ondaǵan jyl boıy qańyrap turǵan telimniń taǵdyry buǵan deıin ótkizilgen aýktsıonnyń qorytyndysyna quqyqtyq baǵa berilgennen keıin ǵana sheshiletin boldy.

Buǵan deıin Astanada jóndeýge jabylyp jatqan kóshelerdiń tizimin jarııalaǵan edik.