Astana ákimi «Sergek» júıesin arab kompanııasyna berý máselesin túsindirdi

ASTANA. KAZINFORM – «Sergek» beınebaqylaý júıesin arab kompanııasyna berý týraly máselege elorda ákimi Jeńis Qasymbek Nura aýdanynyń turǵyndarymen kezdesýde túsinikteme berdi.

Aqpan aıynda «Sergek» júıesi Astanada jumysyn toqtatyp, kameralardy basqarý Birikken Arab Ámirlikteriniń kompanııalaryna ótedi dep habarlandy. Alaıda ákim bul júıeni basqa kompanııaǵa ótkizý emes, yntymaqtastyq ekendigin túsindirdi.

— Olardyń konsortsıýmy bar, birge jumys isteıdi. Bul konsortsıýmdaǵy bas kompanııa — Presight. «Sergek» osy salada jumys isteıtin iri kompanııamen jumysyn jalǵastyryp jatyr, - dep túsindirdi Jeńis Qasymbek.

Onyń aıtýynsha, bul joba aıasynda Astanada 22 myń kamera ornatý josparlanyp otyr, kóbi qurastyryp qoıylǵan. 

— Investıtsııa kólemi — konsortsıým salatyn 53 mıllıard teńge. Negizinen bul qarajat Presight-ke tıesili, — dep atap ótti ákim. 

Jańa kameralar tereńdetilgen analıtıkalyq fýnktsııamen jabdyqtalady. Olar adam men kólik nómirin anyqtaı alatyn deńgeıde bolady.

Qala basshysy atap ótkendeı, buǵan deıin kameralardan alynǵan málimetter árdaıym naqty aqparat alýǵa múmkindik bermegen.

— Polıtsııanyń málimetinshe, búginde kóshedegi barlyq qylmystardyń úshten biri «Sergek» kamerasy arqyly áshkerelendi, - dep tolyqtyrdy ákim.

Onyń aıtýynsha, jobany iske asyrýdy aǵymdaǵy jyldyń 20-25 jeltoqsanyna deıin aıaqtaý josparlanyp otyr.

Buǵan deıin Astana ákimi qaladaǵy jumys kestesiniń ózgerýine qatysty pikir aıtqan bolatyn.