Astana ákimi kommýnaldyq tarıf týraly: Baǵa bir ornynda turmaıdy

ASTANA. KAZINFORM — Astana ákimi Jeńis Qasymbek qalada sarqyndy sý men elektr tarıfiniń qymbattaýyna baılanysty pikir bildirdi. 

— Byltyrdan beri astanalyqtar kommýnaldyq qyzmetke kóp shyǵyndalatyndaryn aıtyp, shaǵymdanyp júr. Soǵan qaramastan jýyqta sarqyndy sý men elektr tarıfiniń qymbattaıtyny belgili boldy. Bul onsyz da tarıftiń qymbattyǵyna shaǵymdanyp júrgen jurt úshin jyǵylǵan ústine judyryq bolmaı ma, — dep surady jýrnalıst.

Jeńis Qasymbek qalanyń aýqymy ósip, turǵyndar kóbeıgen saıyn kommýnaldyq qyzmetpen qamtý shyǵyndary artyp jatqanyn aıtady.

— Ony salystyrý kerek. Sońǵy ret tarıf qashan ózgerdi. Mysaly, aýyzsýdyń 1 tekshe metri bizde 60-70 teńge bolatyn. Al kórshi óńirlerde sý baǵasy 150-200 teńge boldy. Astanada birneshe jyl qatarynan kommýnaldyq baǵalar ózgermedi. Sońǵy jyl, endi báribir ózgerý kerek qoı. Bir deńgeıde báribir turmaıdy. Mysaly avtobýstyń baǵasyn byltyr 90 teńgeden 110 teńgege ózgerttik. 90 teńge degen baǵa 2014 jyldan beri, 10 jyl boıy saqtalyp kelgen. Jalpy bizde sońǵy 4-5 jylda baǵa boıynsha úlken ózgerister bolǵan joq. Endi keıingi 1,5 jyldyń ishinde biz baǵany bir deńgeıge kóterip jatyrmyz. Jalpy Qazaqstan boıynsha aıtsaq, bizdiń tarıfter ózge óńirlerge qaraǵanda ortasha dep aıtýǵa bolady. Elektr baǵasy da respýblıkalyq ortasha baǵamen qaraılas. Qazir qoǵamdyq tyńdaý ótip jatyr. Sol kezde naqty belgili bolady, — dedi ákim.

Eske salsaq, «Astana — óńirlik elektrjelilik kompanııasy» AQ elektr energııasynyń shekti tarıfin 1 kılovatt-saǵatyna 31,67 teńgege deıin kóterýdi usynyp otyrǵanyn jazǵan edik. 

Sondaı-aq, elordada sarqyndy sýǵa qatysty tarıf ósýi múmkin.