Astana ákimi qaladaǵy jumys kestesiniń ózgerýine qatysty pikir aıtty

ASTANA. KAZINFORM — Elordada jumys kestesiniń ózgerýinen bolǵan oń nátıje bir aıdan keıin jarııalanady. Bul týraly Astana ákimi Jeńis Qasymbek málim etti.

Búgin Májilistegi parlamenttik tyńdaý aldynda tilshiler ákimnen elordadaǵy jańa jumys kestesi qandaı nátıje berip jatqanyn surady.

— Jańa kestege kóshý bir aı boıy júzege asyrylady, ıaǵnı memlekettik organdar qamtylady. Bir aıdan keıin naqty kósheler boıynsha, qazirgi kólik qozǵalysy jaıynda málimet beremiz. Bul turǵyda osyǵan deıingi kórsetkishpen salystyryp, tolyq aqparatty jarııalaımyz. Sebebi, bul protsess endi ǵana bastalyp jatyr. Qazir alty-jeti memlekettik organ jańa kestege aýysyp úlgerdi. Jalpy, osy protsess jospardaǵydaı júrip jatyr, barlyǵyna tıisti ýaqyt berildi, — dedi J. Qasymbek.

Onyń aıtýynsha, ákimdiktiń qaramaǵyndaǵy mekemeler bul ózgeristi jaqsy qabyldap, túsinip otyr. Osyǵan qatysty ákimdikte naryzylyq pen renishin bildirgender bolmaǵan.

— Bárimiz jumys istep jatyrmyz. Bireýleri 15 mınýtqa kesh kelse, qalǵandary jumysqa erte kirisip jatady. Ár adamnyń jaǵdaıyn túsinemiz jáne ıkemdi jumys nusqalaryn usynamyz. Sondyqtan eshqandaı shaǵym túsken joq, — dedi qala ákimi.

Eske salsaq, jaqynda Astanada kólik keptelisin azaıtý úshin birqatar uıymnyń jumys kestesi ózgertiledi.

Qala ákimdiginiń málimetinshe ózgerister qala ortalyǵynda ornalasqan memlekettik jáne jartylaı memlekettik qurylymdarǵa qatysty bolady. 

Atap aıtqanda, 15 qyrkúıekten bastap qalalyq kommýnaldyq qyzmetterdiń jumys kúni tańǵy 7:30–da bastalady, Astana ákimdiginiń qyzmeti — 7:30, keıbir memlekettik organdar men jartylaı memlekettik kompanııalar — 7:30–8:00 aralyǵynda bastaıdy. Jumys ýaqytynyń aıaqtalý saǵaty da sáıkesinshe ózgertiledi. Jeke sektor, bıznes, mektepter, balabaqshalar, aýrýhanalar, emhanalar, HQO jáne basqa áleýmettik nysandardyń jumys kestesi ózgermeıdi.
Aıta keteıik, keıbir mınıstrlikter men memlekettik organdardyń jumys kúni burynnan 8:00–de bastalady.