Astana ákiminiń jańajyldyq shyrshasyna 300 bala qatysady
ASTANA. QazAqparat - Elordada qalanyń kishkentaı turǵyndary úshin sıqyrly merekelik oqıǵalar kezeńi bastaldy. Qalanyń barlyq uıymdarynda jańajyldyq shyrsha merekeleri ótýde. Qala ákiminiń atynan osyndaı shara 27 jeltoqsan kúni saǵat 11-de Oqýshylar saraıynda ótedi, shyrsha toıyna 300 jetim-bala men ata-ana qamqorlyǵynan aıyrylǵan balalar, aıryqsha qajettilikteri bar balalar men daryndy búldirshinder shaqyryldy, dep habarlaıdy qalalyq ákimdiktiń baspasóz qymeti.
Qalyptasqan dástúr boıynsha, aýdandyq ákimdikter de balalarǵa arnap mereke ótkizedi. Sharalardyń barlyǵy M. Ótemisov atyndaǵy Oqýshylar saraıynda uıymdastyrylady.
Búgin «Esil» aýdany ákimdiginiń jańajyldyq merekesine aýdan mektepteriniń 200 oqýshysy qatysty. Olardyń arasynda jetim balalar, az qamtamasyz etilgen jáne kóp balaly otbasylardan shyqqan balalar bar. Búldirshinder oıyn oınap, qyzyqty jarystarǵa qatysyp, suraqtarǵa jaýap berdi. Sondaı-aq, olarǵa arnap «Aıaz Atanyń sıqyrly asataıaǵy» atty ertegi qoıyldy. Merekeniń ár qonaǵyna syılyq pen táttiler jınaǵy tartý etildi.
23 jeltoqsan kúni saǵat 9-da «Saryarqa» aýdany ákiminiń shyrsha toıy ótedi, onda da búldirshinderdi kóńildi jarystar men syılyqtar kútedi.
28 jeltoqsanda «Almaty» aýdany ákiminiń atynan merekelik shyrsha keshi uıymdastyrylady. Kishkentaı qonaqtar Aıaz Atamen jáne Aqshaqarmen birge án aıtyp, bı bıleıdi. Balalarǵa merekelik kontsert jáne ertegi keıipkerleriniń qatysýymen teatrlandyrylǵan qoıylym kórsetilip, syılyqtar taratylady.
