Astana ákimi jańa balalar juqpaly aýrýlar aýrýhanasyn ashty (FOTO)
ASTANA. QazAqparat - 9 jeltoqsanda Astana ákimi Ádilbek Jaqsybekov jańa qalalyq balalar juqpaly aýrýlar aýrýhanasyn ashty. Mekeme jańa ári halyqaralyq standarttarǵa saı qondyrǵylarmen jabdyqtalǵan. Aýrýhana qurylysy «100 mektep, 100 aýrýhana» jobasy aıasynda júrgizildi. Bul týraly elorda ákimdiginiń resmı saıtynda habarlady.
Ǵımarat bir-birimen galereıa arqyly baılanysatyn 6 korpýstan turady. Naýqastardy qabyldaý úshin segiz qabyldaý-qaraý meltser boksy jasalǵan, olardyń árqaısysyna kiretin jeke jol bar. Bas ǵımarattyń kire berisinde beınekezdesýler bólmesi ornalasqan. Osylaısha, naýqastar óz palatasynda jatyp týystarymen kórisip, sóılese alady. Á. Jaqsybekov atalǵan júıeni birinshi bolyp synaqtan ótkizdi.
Jańa aýrýhananyń birneshe bólimin qaraǵannan keıin ákim medıtsınalyq personal ujymymen áńgimelesip, densaýlyq saqtaý qyzmetkerine úlken jaýapkershilik júkteletinin atap ótip, olarǵa eńbekteri úshin alǵysyn bildirdi.
«Bul qaladaǵy úzdik aýrýhanalardyń biri, munda zamanaýı tehnologııalar men medıtsınadaǵy jetistikter úılesim tapqan. Mekemeniń ashylýymen qalada kereýet oryndar tapshylyǵy sheshiledi, kólemi keńeıtilip, balalarǵa kórsetiletin medıtsınalyq kómektiń qoljetimdiligi artady. Bul Memleket basshysynyń jeke qoldaýynyń arqasynda múmkin boldy», - dedi Á. Jaqsybekov. Qala basshysy ekonomıkalyq jaǵdaıǵa qaramastan áleýmettik nysandar qurylysy toqtatylmaıtynyn atap ótti.
Bıyl Astanada tórt densaýlyq saqtaý nysany paıdalanýǵa berildi - qalalyq balalar juqpaly aýrýlar aýrýhanasy, ambýlatorııalyq-emhana kesheni, BMSK ortalyǵy, onkodıspanserge japsarlas salynǵan ǵımarat. Jyl sońyna deıin medıtsınalyq-sanıtarlyq ońaltý ortalyǵy salynyp bitedi. Kelesi jyly taǵy da tórt zamanaýı medıtsınalyq mekemeniń qurylysyn aıaqtaý jáne jalǵastyrý josparlanǵan. Olar qalanyń suranys bolǵan aýdandarynda salynady.
Ákimniń sózine qaraǵanda, búginde Astanada árbir qala turǵyny ýaqytyly jáne sapaly medıtsınalyq kómekke qol jetkizýi úshin barlyq jaǵdaı jasalyp jatyr.
Aýrýhananyń jalpy aýdany 60070,49 sharshy metr, sonyń ishinde jeke turǵan ǵımarattar men qurylystardyń aýdany - 1606,05 sharshy metr.
Emdeý blogy úsh bloktan turady, olardyń árqaısysynda 48 boks bar. Jalpy, statsıonar boıynsha 144 boks - 44 bir oryndyq jáne 98 eki oryndyq. Aýrýhanada 9 klınıkalyq bólim, sonyń ishinde jansaqtaý jáne úsh paraklınıkalyq bólim ashyldy. Jańa aýrýhananyń ashylýymen jańa bólimder de ashylady, atap aıtqanda, gepatıt, zoonozdy ınfektsııalar, neıroınfektsııalar, ımmýnologııalyq zerthana.
Jansaqtaý jáne qarqyndy teapııa bólimderi barlyq jastaǵy balalarǵa arnalǵan qazirgi zamanǵy tynys alý apparattarymen, salmaǵy tómen balalarǵa arnalǵan ınkýbatorlarmen, kóliktik kıývezben, ekstrakorporaldy detoksıkatsııa apparatymen jabdyqtalǵan. Barlyq palatalar aseptıkalyq, jeldetkishi avtonomdy jáne qysymy teris taza bólmeler kesheni bolyp tabylady. Bólim vırýstyq, aýa-tamshy jáne ishek ınfektsııalary bloktarynan turady.
Jańa qondyrǵylarmen jabdyqtalǵan jeke zerthana dıagnostıkalaý sapasyn arttyrýǵa múmkindik beredi. Jańa aýrýhanada testter sanyn eki esege (buryn 62 test júrgiziletin) ulǵaıtý kózdelgen. Buǵan deıin jylyna orta eseppen 59 500 zertteý júrgizilse, búginde eki esege artyq oryndaý josparlanǵan. Klınıkalyq-dıagnostıkalaý zerthanasynda júrgiziletin taldaýlarmen qosa, Qazaqstannyń birde-bir balalar juqpaly aýrýhanasynda joq qyzmetter kórsetilmek. Jańa aýrýhananyń ashanasynda tamaqtanýdy uıymdastyrýdyń kóptegen protsesi avtomattandyryldy. Budan basqa, analar men balalar munda barlyq dıetalyq rejımdi saqtaı otyryp, tamaqtana alady.
