Astana ákimi úleskerler problemasyn 3 jylda sheshpek
ASTANA. QazAqparat - Elordadaǵy qurylysy bitpegen problemaly nysandar 2022 jyly tolyq paıdalanýǵa beriledi. Bul týraly búgin Astana qalasynyń ákimi Baqyt Sultanov qala aktıvimen ótken jyldy qorytyndylaýǵa arnalǵan jıynda aıtty, dep habarlaıdy QazAqparat tilshisi.
«Ózderińizde biletindeı, Memleket basshysy «Nurly jer» men «7-20-25» atty aýqymdy turǵyn úı baǵdarlamalaryn iske qosty. Búgingi kúni Astana boıynsha ekinshi deńgeıli bankter japy somasy 20,4 mlrd teńge bolatyn kredıtti maquldady. Bul 1400 otbasyn pátermen qamtamasyz etedi», - dedi Baqyt Sutanov.
Onyń aıtýynsha, baǵdarlama barynsha qoljetimdi bola túsýi jáne qalaǵa qajetti mamandardy tartý úshin bilim berý, densaýlyq saqtaý jáne polıtsııa qyzmetkerlerine baspana satyp alýlaryna 1 mln teńge kóleminde bastapqy jarna túrindegi áleýmettik kómek beriledi. Bul qarajat jergilikti bıýdjetten bólinedi.
«Biz jańa jyldyń aldynda sertıfıkat túrindegi alǵashqy 100 sýbsıdııany berdik. 2019 jyly taǵy da 2 myń sýbsıdııa berýdi josparlap otyrmyz. Degenmen, tolyq salynyp bitpegen nysandar qurylystaǵy problemaly máselelerdiń birine aınalyp otyr. Qazirgi ýaqytta qalada mundaı 29 nysan bar. Úleskerlerdiń problemasyn sheshý úshin Jol kartasyn ázirledik jáne 2022 jyldyń sońyna deıin barlyq problemaly nysandardyń qurylysy aıaqtalady», - dedi ol.
