Astana ákimi túlekterdi mektep bitirýlerimen quttyqtady (FOTO)
ASTANA. QazAqparat - Sońǵy qońyraý - mekteptegi umytylmas saltanatty sharalardyń biri. Bıyl elordalyq 4407 túlek mektep bitiredi, olardyń 173-i «Altyn belgige» úmitker, 3554-i UBT tapsyrady.
Búgin qalanyń barlyq mektepterinde «Sońǵy qońyraý» saltanatty jınalysy uıymdastyryldy. №6 gımnazııada ótken osyndaı is-sharalardyń birine Astana ákimi Ádilbek Jaqsybekov qatysty, dep habarlaıdy elorda ákimdiginiń resmı saıty.
Qala basshysy oqýshylardy, ata-analar men ustazdardy ataýly oqıǵamen quttyqtap, túlekterdi alda jańa belester kútip turǵanyn aıtty.
«Abaıdyń «Adamnyń kúshi biliminde» degen sózderin eske ala otyryp, ustazdaryńyz ben ata-analaryńyzdan alǵan tereń, sapaly bilimderińiz bolashaqta barlyq armandaryńyzdy iske asyrýǵa kómektesetinine senimdimin. Árbirińizdi jańa jeńisterge shabyttandyratyn maqsattar qanattandyrsyn», - dedi qala basshysy túlekterge arnaǵan sózinde.
Qoryta kele, ákim balalarǵa Ulttyq biryńǵaı testileýdi sátti tapsyrýdy, sondaı-aq zor densaýlyq pen tabys tiledi.
Bıyl gımnazııany 72 túlek bitiredi, olardyń tórteýi «Altyn belgige» úmitker. Jalpy №6 mektep gımnazııasynda 1298 oqýshy bilim alýda.
Atalǵan gımnazııa UBT nátıjesi boıynsha ekinshi jyl qatarynan elordalyq mektepter men lıtseıler arasynda kósh bastap keledi, al, ıntellektýaldy saıystardyń nátıjesi boıynsha qaladaǵy úzdik bestikke endi.
Aıta keteıik, sońǵy qońyraýǵa arnalǵan saltanatty jınalystarǵa Qazaqstan Respýblıkasy Premer-Mınıstriniń orynbasary Berdibek Saparbaev pen Qazaqstan Respýblıkasynyń Bilim jáne ǵylym mınıstri Aslan Sárinjipov te qatysty.
Merekeleý «Báıterek» monýmenti aldyndaǵy alańda jalǵasyp, 13.00 «Sońǵy qońyraý syńǵyry!» kontserti men bı keshine ulasady.
Mereke qonaqtary úshin Marına Beısehanova, Tatıana Kım, Renat Maltsagov, aǵaıyndy Júginisovtar, «Z» trıosy, «Ular» dýeti, «Artıst» bı ujymy, «VIVA» shoý-baleti jáne t.b. otandyq estrada juldyzdary óner kórsetedi. Sharanyń júrgizýshileri - Azat Ábiken men Arman Nıkolaevıch.
Osy kúni dástúr boıynsha halyqaralyq olımpıadalar, ǵylymı jobalar baıqaýlarynyń júldegerleri men jeńimpazdary Táýelsizdik saraıynda ótetin «Trıýmf balyna» jınalady. Ozat oqýshylardy quttyqtaý salatanaty 17.00 bastalady. Túlekterdi ınteraktıvti saıystar, bı fleshmoby jáne t.b. qyzyqtar kútýde.
