Astana ákimi toı serýenine arnalǵan kólikterdiń júrgizýshilerinen kóshede dabyl belgisin orynsyz kóp qoldanbaýdy suraıdy

Qala turǵyndarynyń biri ǵalamtordaǵy ákimniń blogyna úılený toılary kezinde jas jubaılar otyrǵan kóliktiń júrgizýshileri kóshede dabyl belgisin tolassyz, úzbeı qosady dep shaǵym bildirgen. «Bul árıne, áldekimder úshin qýanyshty bolar, alaıda, meniń oıymsha, bul mádenıetsizdiktiń belgisi», - dep jazǵan elorda turǵyny.

I.Tasmaǵambetov jol polıtsııasynyń qyzmetkerleri toıǵa qyzmet kórsetetin jalǵa beriletin lımýzın kólikteriniń ıeleri men júrgizýshilerine túsindirý jumystary úzbeı júrgizip otyratyndyǵyn jetkizdi. Alaıda, ákimniń aıtýynsha, bul jumystardyń nátıjesi árdaıym kóńildegideı bolmaıdy. Sondyqtan jyl basynan beri Astana qalasynda saltanatqa arnalǵan 484 kólik toqtatylyp, sonyń ishinde 407 júrgizýshi jol júrý erejesin barynsha buzǵandyqtan, polıtsııa tarapy olarǵa ákimshilik hattama toltyrýǵa deıin barǵan.

«Sondyqtan, úılený toılaryn uıymdastyrýshylardyń kez kelgen jaǵdaıda jol júrý erejesin saqtaýyn suraımyn, sondaı jaǵdaıda ǵana, jas jubaılardyń baqytty kúnderi jol apatymen este qalmaıdy», - degen sóz sońynda I.Tasmaǵambetov.