Astana ákimi Taldykóldegi sasyq ıis joıylǵanyn habarlady

ASTANA. QazAqparat - QR Prezıdenti Nursultan Nazarbaevtiń qatysýymen ótken EKSPO kórmesine daıyndyq máselelerine arnalǵan jıynda Astana ákimi Áset Isekeshev Taldykóldi tazalaý jumystaryna toqtaldy, dep habarlaıdy QazAqparat.

«Ekinshi stansa tolyǵymen paıdalanýǵa berildi. Iis joıyldy. Onyń mańyn abattandyrý, jasyl-jelek otyrǵyzý jáne rekýltıvatsııa jasaý jumystary bıyl qyrkúıek aıyna deıin aıaqtalady», - dep atap ótti Isekeshev baıandama barysynda.

Sonymen qatar jańbyr men qar sýyna arnalǵan káriz júıelerin salý jumysyn da tilge tıek etti. Onyń aıtýynsha, 2016 jyly 3 tazartý qondyrǵysy salynǵan. 2017 jyly taǵy úsheýin paıdalanýǵa berý josparlanyp otyr.

«Úsh magıstraldi kollektor salamyz, sonyń ishinde Esil ózenine sý tógetin kollektor júrgiziledi. Sonyń arqasynda 2017 jyly qalanyń sol jaǵalaýyndaǵy sý burý júıeleri retke keltiriledi. 2018 jyly taǵy on nysan salynady», - dedi ákim.

Óz kezeginde Elbasy Taldykól máselesi sheshimin tapqanyn atap ótti.

«Endi kishi Taldykóldiń problemasy qalyp otyr. Qalanyń túrli aýdandarynda káriz júıeleriniń jaramsyzdyǵy da úlken másele», - dedi N. Nazarbaev.