Astana ákimi óz shyrshasyna ozat oqýshylardy jınady
ASTANA. QazAqparat - Astanadaǵy Oqýshylar saraıynda qala ákiminiń jańa jyldyq shyrshasy ótti. Oǵan oqýda ozat oqýshylar shaqyryldy, dep xabarlaıdy QazAqparat tilshisi.
Jańa jyldyq merekege ákim Áset Isekeshevtiń ózi kelmedi. Biraq orynbasary Ermek Amanshaevty jiberdi. " Ótken jyl bárimizge jaqsy boldy. Qudaıǵa shúkir, jaman bolǵan joq. Astanamyzda xalyqaralyq EKSPO kórmesi ótti. Úlken tabyspen ótti. Aldaǵy jylda elordamyzdyń 20 jyldyǵyn toılaımyz. Atalǵan meıramǵa arnalǵan sharalar bastalyp ketti. Búgingi shyrshaǵa qalamyzdyń ozat oqýshylar jınalyp otyr. Barlyǵymyz birge bolaıyq! Jańa jyldaryńyz qutty bolsyn! Jańa jyldyń aldynda barlyǵymyz erekshe ǵajaıyptardy kútemiz. Sol arman-tilekterińiz oryndalsyn. Barlyq úmitterińiz aqtalsyn!", - dedi E.Amanshaev. 
Osydan keıin qala ártisteri óz ónerlerin pash etti. Qabanbaı batyrdan bastap qazirgi mýltfılm keıipkerlerine deıingi barlyq obrazdar somdaldy. Shyrshanyń eki jaǵynda ornalasqan saxnada ártister birinen soń biri óner kórsetip, balalardyń kóńilin kóterdi. Án de aıtyldy, bı de bılendi. Aıaz ata men Aqshaqar shyǵyp, shyrsha shamdaryn jaqty. Astana ákiminiń orynbasary Ermek Amanshaev ta xalyq arasynda tanymal ekenin kórsetti. Ortaǵa Aıaz ata shyqsa da, ákim orynbasarymen fotoǵa túsikisi kelgen xalyqtyń qarasy tolastamady. Shyrshaǵa belgili rejısser Talǵat Temenov te keldi. Alaıda kóbisi Amanshaevpen fotoǵa túsýge asyqty. 
