Astana ákimi «Ońtústik-shyǵys» shaǵynaýdanynyń kóshelerine asfalt tóseýdi tapsyrdy
2019 jyly shaǵynaýdannyń 19 kóshesine asfalt tóseledi, taǵy 27 kóshede qalpyna keltirý jumystary júrgiziletin bolady. Basym bóligi jeke qurylystan turatyn «Ońtústik-shyǵys» iri alabynyń turǵyndary birqatar qolaısyzdyqtar kórip otyr, atap aıtqanda, ortalyq jylýdyń bolmaýy (úı kómirmen jylytylady, ol ekologııaǵa keri áserin tıgizýde), sý qubyry, káriz júıesiniń qıyndyqtary, jol problemasy. Kóktem men kúzde ne adam, ne kólik óte almaıtyn saz jatady. Ol saz kólikter arqyly basqa da aýdandarǵa jetedi de, kommýnaldy qyzmetterdiń jumysyn qıyndatady. Shaǵynaýdan turǵyndary joǵaryda atalǵan máselelerge baılanysty birneshe ret qalalyq bılik oryndarynyń kómegine júgingen.
Senbi kúni Astana qalasynyń ákimi Baqyt Sultanov qalany aralaý barysynda, «Ońtústik-shyǵys» shaǵynaýdanyna erekshe toqtaldy. Kókpar tuıyq kóshesiniń turǵyndary úılerine sý qubyry jáne kárizdi óz qarajatyna ótkizip, kommýnaldyq tólemderdi ýaqytynda tóleıdi eken. Olar qala ákimdiginiń kóshedegi jolǵa asfalt tóseý máselesin sheshýge kómektesýin suraıdy. Qala ákimi turǵyndardy tyńdap, tuıyq kóshege osy jyly asfalt tóseletinin jetkizdi. 2019 jyly «Ońtústik-shyǵys» shaǵynaýdanynda uzyndyǵy 14,8 shaqyrymdy quraıtyn 19 kóshege jol salý josparlanǵan. Kókpar tuıyq kóshesinen bólek Aqarys, Bekarys, Janarys, Jarkent, Sileti, Yrǵyz, Ý. Subhanberdın, Jaıyq, Ertis, Buqtyrma, Esil, Edil, Qozybasy, Degeres, Qoblandy batyr, Er Kókshe, Jańaarqa, Maıdakońyr kóshelerine asfalt tóselmek. Sonymen qatar, Baqyt Sultanov ýákiletti basqarmalarǵa osy jyldyń ishinde shaǵyn aýdannyń uzyndyǵy 7,2 shaqyrymdy quraıtyn 27 kóshesi men tuıyq kóshesinedegi joldy qaıta jańartý jumystaryn júrgizýdi tapsyrdy. Olar Keles, Nurly, Aqberen, Jańaózen, Kerýen, Mereı, Saıram, Shyraıly, Almaty, Aqtoǵan, Alqońyr, Sútbulaq, Kemel, Jankent, Arǵanaty, Keńgir, Qarasaz, Marqakól, Sarqan, Qaratal, Masaty, Orhon, Qobyz, Bozsholaq, Kertolǵaý jáne eki jol júrý kósheleri arasyndaǵy Sarqan, Orhon kósheleri.
Ákim sondaı-aq, aýdannyń kóptegen kóshelerinde jaryqtyń bolmaýyna nazar aýdaryp, jyl sońyna deıin kóshelerge jaryqtandyrý jumysyn júrgizýdi tapsyrdy.
«Adamdar túnde kóshede júrgende joldy qolshammen jaryqtandyryp júrgeni óte uıat», - dedi ol.
Odan ári ákim «Ońtústik-shyǵys» shaǵynaýdanynyń sol jaq betine bardy. Qozybaı kóshesiniń turǵyndary káriz júıesine qatysty shaǵymyn aıtty. Ákim osy kóshedegi jáne jaqyn mańdaǵy kóshe úılerin tıisti kommýnaldyq kásiporyndardyń qaramaǵyna alýdy jáne kemshilikterdi joıý jónindegi tapsyrmasyn berdi. Odan keıin shahar basshysy Kúıshi Dına kóshesine bardy. Munda jańa joldar nemese demalys aımaǵynyń qurylysy josparlanýda. B. Sultanovtyń pikirinshe, munda pravoslavıelik hrammen úılesip turatyn gúl baǵynyń bolǵany durys.
Ákim at basyn tiregen sońǵy núkte - 2018 jyldyń tamyzynan kúrdeli jóndeýden ótip jatqan «Qazaqstan» sport kesheni boldy (SK 2001 jyly paıdalanylýǵa berilip, sodan beri munda kúrdeli jóndeý júrgizilmegen). Bul rette Baqyt Sultanov №4 BJSM jumysynyń úzilissiz júrip jatqanyn atap ótti. Jóndeý jumystarynyń júrýine baılanysty balalar-jasóspirimder sport mektebiniń oqýshylary «Barys-arena» shaǵyn muz saraıynyń basseınine barady. Alaıda, bıyl «Barys-arena» MLRD júzý joldaryn jalǵa alý quny aıtarlyqtaı ósken jáne BJSM-niń 2019 jylǵa qarastyrǵan bıýdjet qarajatynan aıtarlyqtaı artyq.
«Balalar men jasóspirimder sportyn damytý jáne qoldaý - Astananyń tynys-tirshiligindegi basym baǵyttardyń biri. Jas sportshylardyń sabaqtary basseınniń jóndelýi nemese qarjylyq problemalarǵa baılanysty toqtamaýy tıis», - dedi Sultanov.
Osyǵan baılanysty qala basshysy mádenıet jáne sport basqarmasynyń basshysyna №4 BJSM sportshylaryn «Jastar» Saraıy basseınine aýystyrýdy pysyqtaýdy júktedi. «BJSM úzdiksiz jumys isteý máselesin sheshýdiń balamasy retinde mádenıet jáne sport basqarmasynyń 2019 jyldyń naýryzynda sport mektebiniń bıýdjetin arttyryp, «Barys-Arena» kórsetkishine sáıkes túzetý engizý múmkindigin qarastyryńyz», dedi ákim.
