Astana ákimi nóser jańbyrdaǵy joldar men kóshelerdegi qolaısyzdyqtarǵa baılanysty turǵyndardan keshirim surady
ASTANA. QazAqparat - Astana ákimi Áset Isekeshev Feısbýktegi paraqshasynda nóser jańbyr saldarynan týyndaǵan joldar men kóshelerdegi qolaısyzdyqtarǵa baılanysty qala turǵyndarynan keshirim surady.
Ol qala ákimdigi atynan keshirim ótindi.
«Qalanyń jedel damýy nóserlik káriz júıeleriniń qurylysyn basyp ozdy, saldarynan bul qubylmaly aýa raıy kezinde qolaısyzdyq týdyrýda. Kazgıdromettegi áriptesterimizdiń habarlaýynsha, birneshe kúnge sozylǵan nóser saldarynan Astanaǵa bir aılyq mólsherdegi jaýyn-shashyn jaýǵan», delingen jazbada.
Ákimdik sýdy sorǵyzýǵa jáne kóshelerdi tazartýǵa kommýnaldyq qyzmettiń barlyǵy shyǵarylǵandyǵyn jáne is-sharalar qolǵa alynǵandyǵyn atap ótken.
«Biz joldardyń jabylýyna baılanysty qolaısyzdyqtarǵa túsinistikpen qaraýdy suraımyz. Óz tarapymyzdan qala ákimdigi nóser jaýyn kezinde joldardaǵy jaǵdaılar boıynsha eń aldymen resmı derekózderde - ákimdik saıty men áleýmetti jelilerdegi akkaýntynda, radıo toraptary arqyly, sondaı-aq TJD baılanys quraldaryn paıdalana otyryp barynsha tolyq aqparat berýge tyrysady», dep jazady Áset Isekeshev.
Ákim qaladaǵy keıbir kóshelerde jóndeý jumystary júrgizilip, ondaǵy nóserlik káriz júıesiniń jańǵyrtylǵandyǵyn alǵa tartady.
Bıyl Omarov pen Otyrar kóshesiniń qıylysyndaǵy kollektor qalpyna keltirilip, jyl sońyna deıin Turan dańǵyly men 27 kóshe qıylysyndaǵy tazartý júıleriniń qurylysy aıaqtalady.
Sonymen birge birqatar kóshelerde sý aǵyzatyn kollektorlary men sý tazartý qondyrǵylary salynyp, Turan men Syǵanaq kóshesiniń qıylysyndaǵy tazartý ǵımaraty qaıta jańǵyrtylady.
«Qala aýqymynda osy máseleni júıeli sheshý úshin búgingi tańda nóserlik káriz júıesin damytý baǵdarlamasy boıynsha halyqaralyq ınstıtýttar, ınjenerler jáne sarapashylyq toptarmen birge jumys isteýdemiz. Osy jumystardyń nátıjelerin aldaǵy kúzde mindetti túrde qalanyń qoǵamdyq keńesinde talqylaýǵa qalanyń qoǵamdyq keńesinde talqylaýǵa shyǵaramyz», dep jazdy elorda ákimi.
