Astana ákimi «Meırimdi qala» qaıyrymdylyq aktsııasyna qatysýǵa shaqyrdy
«Jyl saıyn Elbasy óz Joldaýynda áleýmettik saıasatty iske asyrý sapasyn erekshe baqylaýda ustaýdy tapsyrady. Árıne, memleket óziniń barlyq áleýmettik mindetterin oryndaıdy. 2016 jyly qala ákimdigimen 130 myńnan asa adam áleýmettik qoldaýmen qamtyldy. Atap aıtqanda, múgedekter men zeınetkerlerge medıtsınalyq kómek kórsetý, dárilik zattarmen qamtamasyz etý, tegin jáne jeńildikti sanatorııalyq-kýrorttyq emdeý jáne t.b.
Sonymen qatar, Táýelsizdiktiń 25 jyldyǵyna oraı qazirgi áleýmettik baǵdarlamalarǵa qosymsha «Meırimdi qala» qaıyrymdylyq aktsııasy qolǵa alyndy. Osy bastama aıasynda ákimdik qyzmetkerleri men vedomstvoǵa qarasty uıymdar bul aktsııaǵa birinshi bolyp qatysady. Bul bastamany bıznes-qoǵamdastyq ta qoldaıdy dep úmittenemin», - dedi Astana ákimi.
Aktsııanyń maqsaty jalǵyz turyp jatqan zeınetkerler, UOS ardagerleri, barlyq toptaǵy múgedekter, múgedek balalar, turmysy tómen otbasylar, kóp balaly otbasylar, jetim balalar, onkologııalyq aýrýǵa shaldyqqan balalar, DTsP-ǵa shaldyqqan balalar jáne týberkýlezben aýyratyn balalar sııaqty azamattardyń jeńildikti sanattaryna kóńil aýdarý jáne qamqorlyq kórsetý.
Kómek azamattardyń túrli baǵyttar boıynsha, ıaǵnı kıim, azyq-túlik alý, jeńildikti dári-dármekter alý úshin dárihanaǵa arnalǵan sertıfıkattar, otyn áperý jáne t.b. túrinde kórsetiledi.
«Qoǵamda aǵa býynǵa degen qurmet pen yntymaqtastyq sezimin kúsheıtý maqsatynda jastardy - jasotandyqtardy, oqý oryndaryndaǵy jastar isteri jónindegi komıtetterdi jáne basqa da jastar uıymdaryn aktsııaǵa atsalysýǵa shaqyramyn. Qarttarǵa qamqorlyq kórsetýimiz kerek.
Jalǵyz turatyn zeınetkerlerdiń úıiniń aýlasyndaǵy qardy tazalaý men páterlerin jınaýǵa, azyq-túlik satyp alýǵa kómek kórsetseńizder - bul óskeleń urpaqqa jaqsy úlgi bolady dep oılaımyn», - dep atap ótti Á. Isekeshev.
Ózektiligi men mańyzdylyǵyn eskere kele, osyndaı aktsııalardy aldaǵy ýaqytta turaqty túrde ótkizý josparlanǵan.