Astana ákimi memlekettik qyzmetterdiń birqataryn Halyqqa qyzmet kórsetý ortalyqtaryna berýdi usyndy
ASTANA. QazAqparat - Búgin Astana ákimdiginde qala basshysy Ádilbek Jaqsybekovtyń tóraǵalyǵymen memlekettik qyzmetter kórsetý sapasyn arttyrý boıynsha semınar-keńes ótti, dep habarlady Astana qalasy ákiminiń baspasóz qyzmeti.
Keńes taqyryby - memlekettik qyzmetter kórsetý barysyn jeńildetý, memlekettik organdardyń jumysyn jaqsartý jáne bıýrokratııalyq kedergilerdi joıý.
Kezdesý barysynda Ádilbek Jaqsybekov memlekettik organdardyń jumys nátıjesin baǵalaý kezinde árbir azamattyń pikirin esepke alý kerektigin, jumysty jaqsartý úshin qoǵamdyq baqylaýdy paıdalaný, turǵyndardyń aryzdaryna muqııat kóńil bólý qajet ekendigin aıtyp ótti. Óıtkeni, memlekettik qyzmetkerlerdiń negizgi maqsaty - halyqqa sapaly qyzmet kórsetý.
Memlekettik qyzmet sapasyn jaqsartýdyń taǵy bir tásili - elektrondy formalardy paıdalaný, qyzmetterdiń birqataryn Halyqqa qyzmet kórsetý ortalyqtaryna berý.
«Bul jaǵynan alǵanda elorda zań shyǵarýshy bolýy kerek, sheneýnikterdiń azamattarmen qatynasy barynsha az bolýy úshin biz ár bir vedomstvonyń jumysyn taldaı otyryp, sheshim taba alamyz», - dedi qala ákimi.
Kezek máselesin kótere otyryp, qala ákimi Ádilbek Jaqsybekov qalalyq emhanalardaǵy jaǵdaıǵa toqtaldy. Sońǵy kezde qala turǵyndarynan aryz-shaǵymdar kóptep kelip túsýde. Astana qalasy Densaýlaq saqtaý basqarmasynyń basshysy Aıgúl Segizbaevanyń aıtýynsha, sol jaǵalaýda 2 jańa BMSK ortalyǵy men bir aýysymda 250 adam qabyldaı alatyn ambýlatorııalyq-emhana keshenin ashý josparlanǵan. Sonymen qatar, keıbir emhanalarda elektrondy kezekti engizý jáne qabyldaýǵa onlaın júıede jazylý boıynsha jumystar júrgizilýde. Ádilbek Jaqsybekov bul máseleni muqııat zerttep, ony sheshý boıynsha keshendi jumystar atqarýdy tapsyrdy. Qala basshysy densaýlyq saqtaý qyzmetterine erekshe kóńil aýdarýǵa shaqyrdy.
«Tekserilýden tez ótý úshin adamdar mindetti túrde terapevtke barýǵa májbúr. Adamdarǵa emhanalarda eki-úsh saǵat kezekte turýǵa týra keledi. Keıin mamandandyrylǵan dárigerdiń qabyldaýyna kirý úshin taǵy da sonsha kezek kútedi. Medıtsına qyzmetiniń sapasyna sáıkes turǵyndardyń osy salaǵa degen kózqarasy qalyptasady. Sondyqtan, birinshi kezekte turǵyndar tarapynan dárigerlerdiń, polıtsııa qyzmetkerleriniń, kommýnaldyq qyzmet túrleriniń ústinen túsirgen aryz-shaǵymdaryna kóńil aýdarý qajet», - dep atap kórsetti Á. Jaqsybekov.
Keńeske qatysýshylar halyqqa sapaly qyzmet kórsetý boıynsha memlekettik organdar qyzmetin jetildirý boıynsha úlken jumystar atqarylyp jatqanyn atap ótti. Osyǵan baılanysty Astana ákimi memlekettik organdardyń buǵan jaýapty barlyq basshylaryna Memlekettik qyzmetterdiń reglamentin ýaqytyly bekitýdi, barlyq protsedýralardy ońtaılandyrýdy, memlekettik qyzmetter tizilimin keńeıtý boıynsha usynys daıyndaýdy tapsyrdy.
Keńes qorytyndysy boıynsha, memlekettik qyzmet kórsetý protsedýralaryn jetildirýge baǵyttalǵan usynys-hat Ulttyq ekonomıka mınıstrligine joldanady.
