Astana ákimi qyzmettik kólikterdi qaıda jibergenin aıtty
ASTANA. QazAqparat - Astana qalasynyń ákimi Baqyt Sultanov taksımen júrýdiń tıimdiligin eseptep shyqty, dep xabarlaıdy QazAqparat tilshisi.
«Men osy qyzmetke kelgen boıda taksıge otyrdym. «Skoda» markaly kólikpen júremin. Al shamamen 60 qyzmettik kólikti biz ishki ister departamentine berdik. Qazir onyń bárin quqyq qorǵaýshylar paıdalanyp júr. Sonyń arqasynda biraz qarajat únemdelip otyr», - dedi B.Sultanov jýrnalısterge bergen suxbatynda.
Ákimniń aıtýynsha, qyzmettik kólikterdi taksımen almastyrǵan tıimdi. Sebebi memlekettik qyzmetshiler jumys ýaqytynyń biraz bóligin kabınette ótkizedi. Sondyqtan qyzmettik kóliktiń kúni boıy dalada turǵany tıimsiz.
«Ashyǵyn aıtý kerek, biz qyzmettik kólikti kúni boıy paıdalanbaımyz. Biz kóbinese, kabınette jumys isteımiz ǵoı. Al bir jaqqa barsaq, taksıdiń qyzmeti de jetkilikti. Búginde ákimdikke qarasty qyzmetterdiń bári taksımen júredi», - dep atap kórsetti B.Sultanov.
Aıta keteıik, búgin qala ákiminiń tóraǵalyǵymen 2018 jyldyń qorytyndysyna arnalǵan keńes ótti. Sol jerde Baqyt Turlyxanuly áleýmettik jelilerde jarııalanǵan máselelerdi qalaısha júıelep otyratynyn aıtyp berdi.
Ákimniń aıtýynsha, búginde qarapaıym xalyqtyń aryz-shaǵymdary boıynsha keri baılanys ornatýǵa erekshe kóńil bólinip keledi. Máselen, iKomek sııaqty qyzmetter bar.
Degenmen, áli de biraz máselelerdi sheshý kerek. Ákimdiktiń ashyqtyǵyn áli de damytý qajet. «Mysaly, ákim apparatynyń jınalystarynda biz iKomek arqyly túsken árbir aryz-shaǵymdy júıelep, tıisti sharalardy qolǵa alyp otyramyz. Árıne, ákimdiktiń ashyqtyǵyn áli de jetildirý kerek. Bul - basty maqsatymyz. Sebebi bunyń barlyǵy ákimderdiń reıtıngisinde eskeriledi», - dedi B.Sultanov.
