Astana ákimi kúzgi-qysqy jylý berý maýsymyn qorytyndylady
ASTANA. 17 sáýir. QazAqparat - Astanada kúzgi-qysqy jylý berý maýsymy aıaqtaldy. Osyǵan oraı búgin, qala ákimi Imanǵalı Tasmaǵambetovtyń tóraǵalyq etýimen keńes ótip, jylýmen qamtamasyz etý qyzmetteriniń esepteri tyńdaldy.
2011-2012 jyldarǵy jylý berý maýsymyna ázirlik jumystaryn júrgizý úshin arnaıy qalalyq shtab qurylyp, 7 qazanda jylytý maýsymy bastaldy.
Shtabtyń málimetterine sáıkes, jylý berý maýsymynyń basyna turǵyn úıler men bilim, mádenıet jáne densaýlyq saqtaý nysandary 100 paıyzǵa daıyn boldy.
«Astana Energııa» AQ qalany jylýmen qamtamasyz etý úshin alty aıda 1-shi jáne 2-shi JEO-larda 1 mln. 948 myń tonna kómir (nemese 29 969 vagon) jáne 27 myń 996 tonna mazýt (nemese 466 tsısterna) jumsady. Jylý energııasyn jiberý kórsetkishi 4 mln. 154 myń Gkal. qurady, bul ótken jylǵy kórsetkishtermen salystyrǵanda 7,5 paıyzǵa kóp. Ótken qysta jumsalǵan elektr energııasynyń kólemi saǵatyna 1 mln. 197 myń kVt-ty qurady.
Sondaı-aq ótken maýsymda 3 358 tonna (nemese 146 tsısterna) suıytylǵan kómirsýtegi gazy bosatyldy. «Astana Gaz Qyzmet» JShS 1215 kóppáterli turǵyn úıdi, ıaǵnı 68 703 tutynýshyny gazben qamtamasyz etedi.
Qalalyq shtabtyń jetekshisi, ákimniń orynbasary Vasılıı Krylov atap kórsetkendeı, búgingi tańda qalanyń barlyq kommýnaldyq qyzmetteri men energetıkalyq keshen kásiporyndary aldaǵy jylý berý maýsymyna daıyndyq sheńberinde jóndeý baǵdarlamalaryn bekitip, ony júzege asyrýǵa kirisip ketti.
