Astana ákimi káriz qudyqtaryn kúndelikti tekserýdi tapsyrdy
ASTANA. QazAqparat - Astana ákimi káriz qudyǵyna qulap qaıtys bolǵan Arýjan Maratovanyń týǵan-týysqandaryna kóńil aıtty. Ákimdikte aıyptylardyń óz jazasyn tartatyndyǵy aıtyldy, dep habarlaıdy Astana qalasy ákimdiginiń resmı saıty.
Astana ákimdigi Arýjan Maratovanyń týǵan-týysqandaryna kóńil aıtýda.
«Qala basshylyǵy Arýjan týystaryna qoldan kelgenshe kómek kórsetedi. Bul oqıǵa qala ákimi Baqyt Sultanovtyń erekshe qadaǵalaýynda. Polıtsııa departamentine kinálilerdi anyqtap, jazalaý tapsyryldy», dep aıtty Astana ákiminiń baspasóz hatshysy Elvıra Júrgenbaeva.
Qazirgi ýaqytta tergeý amaldary júrgizilýde. Tergeý nátıjeleri týraly qosymsha habarlanatyn bolady.
Arýjan Maratova senbi, 24 qarashada habar-osharsyz ketken bolatyn. Onyń jansyz denesiz kelesi kúni tabyldy. Ol ashyq turǵan káriz qudyǵyna qulap ketip qaıtys bolǵan. Deneni shyǵarýǵa ortalyq aımaqtyq aeromobıl qutqarý jasaǵynyń qyzmetkerleri qatysty. Qaıǵyly oqıǵaǵa baılanysty Astana ákimi Baqyt Sultanov osyndaı jaǵdaıdyń aldyn alý maqsatynda barlyq qalalyq qyzmetke barlyq káriz qudyqtaryn kúndelikti qadaǵalap otyrýdy tapsyrdy. Qazirgi kezde qalada shamamen 65 myń qudyq bar.
«Ókinishke oraı, kún sýytqaly káriz qudyqtarynyń qaqpaǵyn urlaý jıilep ketti. Olar bólingen kúıde túrli tústi metall qabyldaıtyn oryndardan tabylyp jatady. Atalmysh fakti boıynsha da polıtsııa departamenti tıisti jumystardy júrgizip jatyr», - dedi E. Júrgenbaeva.
Osy aıdyń ózinde 109 jedel nomerine qala turǵyndarynan 356 qońyraý túsken. 1 myńǵa jýyq ashyq káriz qudyqtaryn qalalyq kommýnaldy qyzmetter anyqtaǵan bolatyn. Anyqtalǵan barlyq ashyq qudyqtar birden jabylady.
Tek sońǵy aptanyń ózinde ashyq qalǵan qudyqtar boıynsha 109 qyzmetine 214 habarlama túsken. Polıtseıler keıde bir qudyqtyń ashyq jatqany týraly habarlamanyń bir aıda birneshe ret keletinin aıtady.
Ár ótinim boıynsha polıtsııa qyzmetkerleri tıisti jumys júrgizedi.
«Qala ákimi káriz qudyqtarynyń qaqpaǵyn urlaýǵa jol bermeıtin júıeli sharalar qoldanýdy, atap aıtqanda qulpy bar berik qaqpaqtardy ornatýdy tapsyrdy», - dedi E. Júrgenbaeva.
Qala basshylyǵy turǵyndardan ashyq jatqan káriz qudyǵyn, ne qudyq mańynda júrgen kúdikti jandardy kórgen jaǵdaıda, nemquraılylyq tanytpaı, 109 qyzmetine habarlaýdy suraıdy.
