Astana ákimi káriz qudyǵynan tabylǵan balaǵa qatysty pikir bildirdi
ASTANA. QazAqparat - Elordada «Sergek» kameralarynyń arqasynda jol-kólik oqıǵalarynan bolatyn ólim-jitim 2 ese azaıdy. Bul týraly búgin qala halqynyń aldynda esep bergen Astana ákimi Baqyt Sultanov aıtty, dep habarlaıdy QazAqparat tilshisi.
«Sergek» kameralarynyń arqasynda ashyq jatqan káriz qudyqtaryn anyqtap otyrmyz. Ókinishke oraı, adam ólimi oryn alǵan jaıttar da bar. Keshe ǵana balany taýyp aldyq. Bul jerde túrli sharalar qabyldap jatyrmyz. Jelilerdi salyp, káriz qudyqtaryn ashyq qaldyrǵan qurylysshylarǵa júıeli sharalar qoldanylady. Kommýnaldyq qyzmetterimiz kún saıyn olardy tekserip shyǵýy qajet. Osy ýaqyttyń ishinde ashyq jatqan myńdaǵan káriz qudyǵyn taýyp, japtyq», - dedi qala basshysy.
Onyń aıtýynsha, káriz qudyqtarynyń qaqpaǵyn urlaý derekteri de tyıylmaı otyr.
«Qaqpaq ornatasyń, al tańerteńinde joq. Azamattardan saq bolýdy jáne der ýaqytynda habarlaýdy ótinemin. Biz shara qabyldaıtyn bolamyz», - dedi B.Sultanov shoıyn qaqpaqtardy qabyldaıtyn oryndarǵa da sharalar qabyldanatyndyǵyn jetkizdi.
Jalpy, ákim deregine qaraǵanda, qalada 6 myń «Sergek» kamerasy ornatylyp, jumys istep tur. Sonyń arqasynda aýlalarda oryn alatyn qylmys eki esege tómendegen.
«Sergektiń» arqasynda jol-kólik oqıǵasynyń saldarynan bolatyn ólim-jitim de 2 ese tómendedi», - dedi B.Sultanov.
