Astana ákimi Qaraótkel kentindegi medortalyqtyń túıitkilin sheship berdi
ASTANA. QazAqparat - Astana ákimi Áset Isekeshev elordanyń shet aýmaqtaryn damytý aıasynda birneshe áleýmettik nysandy aralap, olardyń jumysymen tanysty, dep habarlaıdy QazAqparat qala ákiminiń baspasóz qyzmetine silteme jasap.
Qaraótkel (Ilınka) kentinde Áset Isekeshev 10-shy emhananyń janyndaǵy otbasylyq densaýlyq saqtaý ortalyǵynda boldy. Medıtsınalyq mekeme bir aýysymda 150 kelýshini qabyldap, 12 myń halqy bar kentke qyzmet kórsetedi. Buryn ortalyqta tar sheńberli mamandar bolmaǵan. Qaraótkel turǵyndarynyń ótinishi boıynsha qala ákimdiginiń sheshimimen bıyldan bastap densaýlyq saqtaý ortalyǵynda kóz dárigeri jáne gınekolog mamandar turaqty túrde jumys isteıtin bolady. Sonymen qatar, qajettiligine qaraı nevropatolog pen endokrınologtar da kelip turady.
«Elimizde azamattardy qoljetimdi jáne sapaly medıtsınalyq qyzmetpen qamtamasyz etý úshin barlyq qajetti sharalar qabyldanýda. Qala ákimdigi úshin bul basymdyqtardyń biri. Qazirgi kezde Astanada 45 densaýlyq saqtaý nysany bar. Sonyń ishinde, memlekettik jáne jekemenshik sýbektiler tegin medıtsınalyq kómektiń kepildi kólemi aıasynda jumys isteıdi», - dep atap ótti Áset Isekeshev.
Qala mańyndaǵy turǵyn úı alabtarynyń máselelerin sheshý Astana ákimdiginiń basty mindetteriniń biri bolyp tabylady.
Qarasha aıynda Áset Isekeshev birneshe kóshpeli otyrys ótkizip, olardyń barysynda Promyshlennyı, Óndiris, Jeleznodorojnyı, Kóktal kentterin damytý josparlary qaraldy.
Jalpy, Astanada 150 myńǵa jýyq adam turatyn 20 turǵyn úı alaby bar. Eldi mekenderdiń barlyǵy jol jóndeý, kóshelerdi jaryqtandyrý, qosymsha avtobýs marshrýttaryn ashý, mektep, emdeý mekemelerin salý jáne keńeıtý, kásiporyndar qurý, sondaı-aq, oıyn jáne sport alańdaryn ashý jumystaryn júrgizýdi qajet etedi. Barlyq problemalyq máseleler halyqtyń jaılylyǵyn arttyrý jónindegi Jumys josparyna engizildi jáne jedel túrde sheshiledi.
«Aldymyzda abattandyrý, ınjenerlik-kólik ınfraqurylymy, telekommýnıkatsııa júıesi, áleýmettik-qyzmet kórsetý salasy jáne JTQ aımaǵyn elordanyń talaptaryna saı qylý, ómir súrý úshin qolaıly jaǵdaılar jasaý mindeti tur»,- dedi Astana ákimi.
