Astana ákimi qalany lastaǵan qurylys kompanııalaryna qarsy «soǵys» jarııalady
ASTANA. QazAqparat - Astana ákimi ekologııany qadaǵalaıtyn organdarǵa «kabınetterden shyǵyp, jumysqa kirisýge» keńes berdi, dep habarlaıdy QazAqparat Elorda.info-ǵa silteme jasap.
«Normalardy buzyp, qala kóshelerin lastap jatqan qurylys kompanııalaryna qatań sharalar qoldanatyn bolamyz. Prokýratýra men ekologııalyq polıtsııa, ekologııa departamenti, tabıǵatty qorǵaý prokýratýrasy kabınetterden shyǵyp, jumysqa kirisýleri qajet. Qalany tazalaıyq», - dedi Áset Isekeshev qalalyq ákimdikte ótken keńeste.
Qala ákimi Astanada «Taza juma» aktsııasynyń jalǵasyp jatqandyǵyn, ekologııalyq aılyqtyń bastalǵanyn, 29 sáýir men 13 mamyrda dástúrli senbilikterdiń ótetinin eske saldy. Sonymen birge, Áset Isekeshev elordada jumys istep jatqan qurylys kompanııalary qurylys mádenıetin kóterýi tıis dep esepteıdi.
«Qurylys mádenıetin anaǵurlym joǵary deńgeıge kóterýdi usynamyn. Qurylys normalaryn, sanıtarlyq jaǵdaıdy saqtamaǵany úshin qoıylatyn talaptardy kúsheıtý úshin qajet bolsa zańnamaǵa qurylys lıtsenzııalarynan aıyratyn usynys ázirleımiz», - dedi Á.Isekeshev.
Ákim jańadan salynyp jatqan nysandardy ózi aralaıtynyn eskertti.
«Eger tártip buzýshylyqtar bolyp jatsa mundaı kompanııalarǵa keleshekte elordada jumys isteýge tıym salý qajet», - dep túıindedi sózin Isekeshev.
