Astana ákimi qalalyq saıabaqtardaǵy ınfraqurylymdy damytýdy tapsyrdy
ASTANA. QazAqparat - Búgin Astana ákimi Ádilbek Jaqsybekov kezekti apparat otyrysy barysynda memlekettik qyzmettiń damýyna súbeli úles qosqan qyzmetkerlerge «Úzdik memlekettik qyzmetshi» tósbelgilerin tabystady, dep habarlady qalalyq ákimdiktiń baspasóz qyzmetinen.
- Memlekettik qyzmetshiler kúni - Memleket basshysy aıqyndaǵan kásibı memlekettik apparat jumysynyń negizgi prıntsıpi - halyqqa qyzmet etýdi nasıhattaýǵa, memlekettik qyzmettiń bedelin nyǵaıtýǵa septigin tıgizýi qajet, - dedi ákim. Memleket basshysy bekitken «Úzdik memlekettik qyzmetshi» tósbelgisimen «Esil» aýdanynyń ákimi Sabıla Mustıfına, qala ákiminiń keńesshisi Mıhaıl Cherkov, Ekonomıka jáne bıýdjetti josparlaý basqarmasynyń basshysy Janat Nurpeıisov, ákimniń kómekshisi Úmbetbaı Maǵzumov, Jer qatynastary basqarmasy basshysynyń orynbasary Nazymbek Kenjebaev, qala ákimi apparaty memlekettik-quqyqtyq bóliminiń basshysy Qaırat Kópbaev marapattaldy. Apparat otyrysy barysynda elorda basshysy «EKSPO-2017» kórmesin uıymdastyrý men ótkizý jumystaryna erekshe toqtaldy. Úsh aıǵa jalǵasatyn kórme aýmaǵynda 3 myńnan astam mádenı-demalys sharasy uıymdastyrylmaq. Ákimniń aıtýynsha, olardyń árqaısysy halyqaralyq deńgeıde bolýy shart. Sonymen qatar, týrıster men qala turǵyndarynyń demalysyn túrlendirý maqsatynda iri sharalar elordanyń barlyq aýmaǵynda ótýi kerek. - Qazirgi kezde elordalyq saıabaqtarǵa kelýshiler sanyn ulǵaıtýymyz qajet, saıabaqtar turǵyndardyń súıikti demalys oryndaryna aınalýy tıis. Ol úshin ınfraqurylymdy jaqsartyp, sharalardy kóptep ótkizý kerek, - dedi qala basshysy. Á. Jaqsybekovtyń aıtýynsha, qazaqstandyqtardyń kórmege kelýi men qatysýyn arttyrý maqsatynda aımaqtarmen birlese qyzmet etý kerek. - Aımaqtaǵy mektep oqýshylary men stýdentter úshin EKSPO aýmaǵynda eksrkýrsııalar ótkizý máselesin qarastyrý qajet. Bir sózben aıtqanda, barlyq qalalyq qurylymdar týrıster men astanalyqtardyń kórmege qatysýyn, sondaı-aq, qalalyq saıabaqtar men demalys oryndary nasıhattaýdy qamtamasyz etýi kerek, - dep túıindedi ákim.
