Astana ákimi qaladaǵy halyqqa qyzmet kórsetetin mekemelerge tekserý júrgizýdi tapsyrdy
ASTANA. QazAqparat - Astanada arnaıy top qurylyp, qaladaǵy halyqqa qyzmet kórsetetin barlyq mekemelerde tekserý jumystaryn júrgizbek, dep habarlaıdy elorda ákimdiginiń baspasóz qyzmetinen.
2 naýryz kúni elorda ákimdiginde qala basshysy Ádilbek Jaqsybekovtyń tóraǵalyǵymen kezekti apparattyq keńes ótti. Qala basshysy ákimdiktiń resmı saıtyna turǵyndardan kelip túsken saýaldarǵa jáne olarǵa beriletin jaýaptarǵa erekshe mán berdi. Jyl basynan beri ákimdiktiń resmı saıtyna qala tuǵyndarynan 1 313 saýal kelip túsken, olardyń árqaısysy quzyretti mekemelerge joldandy.
- Ákimniń orynbasarlaryna bul máselege jaýapkershilikpen qaraýdy buıyramyn. Birinshi toqsanda «051» qyzmetine, «Baılanys ortalyǵyna» jáne ákim saıtyna túsken saýaldar boıynsha taldaý júrgizilsin, - dedi qala basshysy. Ol qalalyq densaýlyq saqtaý mekemeleriniń jumysyn saraptaı kele, jalǵan medıtsınalyq qujattardy qoldaný faktileriniń anyqtalǵandyǵyna nazar aýdardy. Osy oraıda Á.Jaqsybekov arnaıy top quryp, elordanyń halyqqa qyzmet kórsetetin barlyq mekemelerinde tekserý jumystaryn júrgizýdi tapsyrdy. Gazben qamtý salasyndaǵy qyzmet túrlerine toqtalǵan elorda ákimi sońǵy ýaqytta ákimdik saıtyna tutynýshylar tarapynan qyzmetterdiń tómen deńgeıde kórsetiletini týraly shaǵymdar kóp túsetinin jetkizdi. Osyǵan baılanysty ol tıisti sharalar qoldanyp, 1200 turǵyn úıge qyzmet kórsetetin «GazQyzmet» JShS jumysynyń sapasyn arttyrýdy tapsyrdy. - Úılerdiń jertólelerinde shaǵyn jáne orta bıznes nysandarynyń gaz ballondaryn zańsyz qoldanatyny týraly shaǵymdar kóp túsýde. Turǵyn úı ınspektsııasyna Tótenshe jaǵdaılar departamentimen birigip, turǵyn úılerdiń jertólelerinde gaz ballondaryn paıdalaný faktilerin anyqtap, oǵan tosqaýyl qoıý úshin reıdtik sharalar ótkizýdi tapsyramyn. Bul eń aldymen adamdardyń ómirine qaýip tóndiredi, - dedi Á.Jaqsybekov. Sondaı-aq keńes qorytyndysy boıynsha aldaǵy merekelerge oraı jumys jospary talqylandy.
