Astana ákimi qala mektepterinde psıhologııa pánin júrgizýdi usyndy
ASTANA. QazAqparat - Búgin elordadaǵy Tamyz keńesinde Astana ákimi Imanǵalı Tasmaǵambetov mektep baǵdarlamasyna psıhologııany engizýdi usyndy.
«Men QR Bilim jáne ǵylym mınıstrligine Astananyń keıbir mektepterinde eksperımenttik negizde «psıhologııa» pánin engizý múmkindigin qarastyrýdy usynamyn», - dedi qala basshysy. Osy oraıda ákim jaqyn arada psıhologııanyń bazalyq kýrstarynyń biryńǵaı ádistemesin daıarlaý kerektigin atap ótti. Munymen qosa I.Tasmaǵambetov kúrdeli dúnıetanymdyq máseleler boıynsha joǵary synyp oqýshylarymen sabaqtan tys psıhologııalyq trenıngter uıymdastyrýdy usyndy. «Bala tárbıesinde qıyn psıhologııalyq talqylaýǵa ata-analardy óz erkimen jumyldyrýdy qamtamasyz etý kerek. Sonymen qatar oqý jyly barysynda mektep dırektorlaryna, olardyń tárbıe jumysy boıynsha orynbasarlary úshin, sondaı-aq joǵary synyptardyń jetekshilerine tanymal pedagog-psıhologtardyń qatysýymen semınarlar men trenıngter ótkizý mańyzdy», - dep atap ótti ákim. Bul turǵyda qala basshysy osy taqyryp boıynsha bilim basqarmasy men óziniń orynbasaryna sharalar josparyn bekitýdi tapsyrdy.
