Astana ákimi Imanǵalı Tasmaǵambetov Orys Pravoslav shirkeýiniń joǵary nagradasymen marapattaldy
ASTANA. Qańtardyń 17-si. QazAqparat /Aıdar Ospanalıev/ - Búgin elimizge Elbasy Nursultan Nazarbaevtyń shaqyrýymen arnaıy kelgen Máskeý jáne búkil Rýs Patrıarhy Kırıll Astana ákimi Imanǵalı Tasmaǵambetovke Orys Pravoslav shirkeýiniń áýlıe Serafım Sarovskıı atyndaǵy 2-shi dárejeli ordenin tabys etti,
dep habarlaıdy QazAqparat.
Onda dinaralyq tózimdilik pen kelisim, ózgelermen ortaq til tabysýǵa, ıaǵnı dıalogqa degen umtylys Memleket basshysy Nursultan Nazarbaevtyń elde júrgizip otyrǵan saıasatynyń basty baǵyttarynyń biri ekendigin atap ótken Astana ákimi «Al Ýspen soborynyń qurylysy Prezıdenttiń tapsyrmasymen jáne onyń tikeleı qatysýymen júrdi. Osynyń ózi Qazaqstandaǵy konfessııaaralyq kelisimniń máńgi saqtalatyndyǵyn kórsetse kerek. Sizdiń búgingi saparyńyz elimizdiń astanasyndaǵy eń bir aıtýly oqıǵalardyń biri bolatyny sózsiz. Siz pravoslav senimindegi azamattardyń basshysy retinde álemde ózara senim men túsinistikti qalyptastyrýǵa ólsheýsiz úles qosyp kelesiz. Sol úshin de sizge zor alǵysymdy bildirgim keledi», dep atap kórsetti Astana ákimi.
Osy sózderinen soń ol Memleket basshysynyń Patrıarh Kırıldiń Qazaqstan astanasynda bolǵandyǵyna estelik retinde arnaıy daıyndaǵan qudaı ana beınesindegi ıkonasyn tapsyrdy.
Ýspen kafedraldyq soborynyń qurylysyna úles qosqany úshin «Samuryq-Qazyna» ál-aýqat qorynyń basqarma tóraǵasynyń orynbasary, «QazMunaıGaz» ulttyq kompanııasy dırektorlar keńesiniń tóraǵasy Tımýr Qulybaev Orys Pravoslav shirkeýiniń áýlıe knıaz Danııl Moskovskıı atyndaǵy 2-shi dárejeli ordenimen, sondaı-aq «Qazaqstan temir joly» ulttyq kompanııasynyń prezıdenti, Astananyń burynǵy ákimi Asqar Mamın Orys Pravoslav shirkeýiniń áýlıe knıaz Danııl Moskovskıı atyndaǵy 3-shi dárejeli ordenimen marapattaldy. Mártebeli meman marapatty Astanadaǵy ózge de birqatar laýazym ıelerine tabys etti.
