Astana ákimi I.Tasmaǵambetovtyń tóraǵalyq etýimen 7-nshi Qysqy Azııa oıyndaryna daıyndyq máseleleri boıynsha keńeıtilgen keńes ótti
ASTANA. 15 jeltoqsan. QazAqparat /Gúlmıra Álıakparova/ - Astana qalasy ákimdiginde elorda basshysy Imanǵalı Tasmaǵambetovtyń tóraǵalyq etýimen 7-nshi Qysqy Azııa oıyndary men Alaý estafetasyn uıymdastyrý jáne ótkizý máseleleri boıynsha keńeıtilgen keńes ótti.
Oǵan Oıyndardy uıymdastyrý komıteti atqarýshy dırektsııasynyń, Alaý estafetasy dırektsııasynyń, sondaı-aq Azıada daıyndyǵyna jaýapty quzyrly qalalyq qurylymdardyń basshylary qatysty.
Keńeste EQYU Sammıtin uıymdastyrý kezinde qalanyń jınaǵan tájirıbesin Azııa oıyndarynda paıdalaný máselesi talqylandy. Qonaqtardy kútý jáne ornalastyrý, logıstıka men qaýipsizdik - daıyn syzbalar boıynsha ótkiziletin boldy.
«Biz EQYU Sammıtin uıymdastyrý kezinde mol tájirıbe jınadyq. Jumysymyz tıimdiligin kórsetti. Sondyqtan onyń bárin Azıadada qoldanylýymyz kerek», - dep atap ótti I.Tasmaǵambetov.
Jınalys barysynda oıyndarǵa deıin qalǵan 47 kúnde kúsheıtilgen jumystar júrgizilýi tıis negizgi tórt baǵyt anyqtaldy. Olardyń birinshisi, jalpy uıymdastyrý máselelerin qamtıdy. Atap aıtqanda, Azııa Olımpıadalyq keńesi atqarýshy komıtetiniń otyrysyn ótkizý, meımandardy áýejaıda kútip alý, welcome-saltanatty sharalar barysynda olardy qarsy alý, qonaq úılerge ornalastyrý, qalanyń syrtqy kelbetin daıyndaý, baspasóz ortalyǵynyń jumysyn uıymdastyrý, bıletterdi satý.
Ekinshi baǵytyna - Oıyndardyń saltanatty ashylý rásimi, kelesine - sporttyq oıyndardy uıymdastyrý jáne Alaý estafetasyn ótkizý máseleleri endi.
